WASIIRKA WASAARADADA ISGAARSIINTA TEKNOLOJIYADA AYAA KA QEEB GALAY 𝗦𝗛𝗜𝗥𝗞𝗔 𝗫𝗢𝗢𝗝𝗜𝗡𝗧𝗔 𝗠𝗔𝗦𝗛𝗥𝗨𝗨𝗖𝗔 𝗜𝗦𝗞𝗨𝗫𝗜𝗥𝗞𝗔 𝗗𝗛𝗜𝗝𝗜𝗧𝗔𝗔𝗟𝗞𝗔 𝗘𝗘 𝗕𝗔𝗥𝗜𝗚𝗔 𝗔𝗙𝗥𝗜𝗞𝗔.

Madaxweynaha DDS, mudane Mustafe Muxummed Cumar ayaa tababbarka usoo xidhay xoog ciidan oo loo layliyay ciidamada maleeshiyaadka DDS oo ah dufcadda koowaad si loo xoojiyo nabadgelyada iyo xasiloonida bulshada. Qaybo kamid ah tababbaradii ay qaateen ciidamadu muddadii ay xaraysnaayeen gaar ahaan: Shiishka dhaw iyo midka fog, qaab dagaalka iyo gaardi ka ciyaarka ayay usoo bandhigeen masuuliyiinta. Madaxweynaha DDS, mudane Mustafe Muxummed Cumar ayaa sheegay in ka xukuumad ahaan doonayaan in ay kor uqaadaan tirrada ciidamada Deegaanka maadaama Deegaanku uu ballaadhanyahay si loo sugo nabadgelyada xudduudaha iyo mida gudahaba. Madaxweynaha ayaa kula dardaarmay ciidamada in ay uhoggaansamaan shuruucda iyo hannaanka dawladnimo, goobaha la geeyana ay ku filnaadaan amnigiisa, bulshada ay udhaarteena aysan uhorseedin wax dhib ukeena. Mudane Dayib Axmed Nuur, Hoggaanka Nabadgelyada DDS ayaa yidhi; Sugidda amniga bulshadiina waa masuuliyadiina ugu balaadhan ee la rabo in sidii loogu talo’galay aad ugasoo baxdaan, goobaha aad tagaysaana aad ka xoojisaan hirgelisaan sarreynta sharciga. “Kuliyadda Tababbarada Booliska DDS ayaa isbaddalkii kaddib juhdi iyo wakhti badan galisay in ay soo saarto ciidammo tayo iyo tirro ahaanba ka dhisan”, Janaraal C/raxmaan Axmed Nuur, Maareeyaha Kuliyadda Tababbarada Booliska DDS. Waxaa xusid mudan in isla shalay uun ay ka qalin-jabiyeen ciidammo kuwan lamid ah Tuulada Koolo ee degmada Doollo-addo; Kuwaasi oo tababbarku hal maalin uwada furmay kuwa maanta qalin-jabiyay.

Wararka naga soo gaaraya gobolka Bari ayaa sheegaya in haatan ay kasii dareyso xiisadda u dhexeysa ciidamada PSF iyo maamulka Puntland ee ka taagan garoonka magaalada Boosaaso ee xarunta gobolkaasi oo ay isku qabteen labada dhinac. PSF ayaa mar kale xalay soo saartay digniin culus, waxayna sii adkeystay digniintii hore ee ahayd in laga fogaado aagga garoonka Boosaaso, sidoo kalena aysan kasoo dagi karin diyaaradaha duulimaadka. Qoraalka taliska oo xalay la shaaciyay ayaa waxaa lagu sheegay in aanu weli xal rasmi ah laga gaarin arrinta garoonka, ayna u digayaan shacabka iyo shirkadaha duulimaadyada. Taliska PSF ayaa si gaar ah ugu digay diyaaradaha Daallo Arline iyo Itoobiya Arlines, wuxuuna sheegay shirkaddii u hoggaansami wayso amarkooda in ay iyadu qaadi doonto mas’uuliyadda wixii halkaasi ka dhaco. Khilaafka ugu wayn ayaa ka dhashay isticmaalka garoonka oo ay PSF sheegtay in loo diiday ciidamadeeda iyo xittaa in laga dhoofiyo askar ka dhaawacantay, waxayna Puntland ku eedeysay inay garoonka u beddashay xero ciidan. “Garoonka diyaaradaha ee Boosaaso ma ahaan doono goob u xiran ciidamo gaar ah ama qoys gaar ah waxaan uga digeynaa dhammaan shacabka ku dhaw garoonka Boosaaso in ay isaga fogaadaan. Garoonka diyaaradaha ee Boosaaso ma ahaan doono goob u xiran ciidamo gaar ah ama qoys gaar ah” ayaa lagu yiri qoraal kasoo baxay ciidamada PSF. Puntland ayaa iyana maalin kahor jawaab ka bixisay digniinta ciidanka PSF, waxayna hoosta ka xariiqday in wax xaalad ah aysan ka jirin Boosaaso, isla markaana ay tahay nabadgelyo. “Waxaan rabnaa in shacabka magaalada in ay ogaadaan in aysan jirin nabad galyo xumo, waxaan uga digeynaa dadka nabad galyo darrada abuuraya in ay ka fogaadaan” ayuu yiri guddoomiyaha maamulka gobolka Bari. Arrintan ayaa durbo dhalisay xiisad xoogan oo laga dareemay Boosaaso oo ay horay ugu dagaalameen ciidamada PSF-ta iyo kuwa kale oo taabacsan madaxtooyada maamulkaas.

Hoggaamiyaha guud ee Ahlu-sunna Waljamaaca Macallin Maxamuud Sheekh Xasan ayaa markii ugu horreysay ka hadlay dagaal beeleedka lagu hoobtay ee kasoo cusboonaaday waqooyiga gobolka Galgaduud ee bartamaha dalka. Macallin Maxamuud ayaa sheegay in wax laga xumaado ay tahay inay is laayaan dad walaalo ah oo haddana muslimiin ah, ayna iska dilaan dad badan oo aan waxba galabsan. “War Maxaa la’isku leynayaa maxaa dadka loo dilayaa maxaa dhibaatadaas loo gaysanayaa hadda wax aan cid ka xanuunsaneyo la arag ugu yaraana dhowr boqol oo qof ay ku dhimanayaan waa dhibaato xaqiiqi ah” ayuu yiri Macallin Maxamuud Sheekh Xasan. Sidoo kale waxa uu tilmaamay in culimada Soomaaliyeed ay ka gaabiyeen doorkii ay ka qaadan lahaayeen colaadaasi, wuxuuna ugu baaqay inay u istaagaan xalka. “Dhibaatada jirto ayaa waxa ay tahay doorkii culimada ayaa meesha laga waayay, waxaana leeyahay culimada doorkoodii hasoo celiyaan” ayuu sii raaciyay. Waxaa kale oo uu yiri “Waxaan leeyahay qaddiyooyinka noocaas oo kala ah waxaan waydiisaneynaa mar dambe in aysan ka dhicin dadka muslimiinta ah waa dad aan meel kala aadeyn”. Hoggaamiyaha Ahlu-sunna ayaa ugu dambeyntii baaq culus u diray beelaha dagaalamaya, wuxuuna ka dalbaday inay ka waantoobaan dagaalka ay isku laynayaan. “Waxaan soo jeedineynaa oo magaca Ahlu-sunna Waljamaaca kusoo jeedineynaa ummaddu inay ka waantowdo waxaan oo kale, dib dambana aysan uga dhicin” ayuu yiri. Hadalkan ayaa kusoo aadayo, ayada oo weli ay socdaan dadaallada lagu heshiisiinayo beelaha Soomaaliyeed ee ku dagaalamayaa agga deegaanka Laadheer oo u dhexeeya magaalooyinka Caabudwaaq iyo Xeraale ee waqooyiga gobolka Galgaduud.