Dowladda Liibiya ayaa sheegtay Sabtidi in ay burburisay shabakad dadka tahriibisa oo ka dhisneyd dhinaca Koonfur-galbeed ee dalkaas, iyada oo la xiray xubno ka tirsan kooxdaas sida uu bayaan uu soo dhigay bogga Facebook ku sheegay, xafiiska xeer-ilaaliyaha guud ee Liibiya. Ciidamada ayaa xiray mid ka mid ah hogaamiyayaasha shabakadan magafa-yaasha ah iyo 10 xubnood oo kale oo lagu eedeeyay dil, xarig sharci darro ah, jirdil, iyo kufsi loo geystay muhaajiriin, sida lagu xaqiijiyay bayaanka. Baaritaan ay dowalddu sheegtay in ay sameysay, ayaa muujiyay in kooxahani ay dhibaatooyin isugu jira xarig qasab ah, jirdil iyo baad ay ugu geysteen muhaajiriin gaareysa 1,300 oo qof. Dadkaan ayay u xirteen sifo ay uga qaataan lacago baad ah si loo sii daayo. Liibaya ayaa fowdo lugaha la gashay, kaddib marki duullaan ay hogaamineysay NATO talada looga tuuray laguna dilay hogaamiyihi hore ee dalkaasi Muammar Gaddafi. Wixi markaasi ka danbeeyay dalkaasi saliidda hodonka ku ah, ayaa waxaa taladiisa ku loollamayay laba dowladood oo ay kala taageeraan malleeshiyaad hubeysan.  

Al-Shabaab ayaa xalay madaafiic ku weerartay Saldhig ciidamada Itoobiya ku leeyihiin degmada Xudur ee Xarunta Gobolka Bakool. Goobjoogayaal ayaa sheegay inay maqlayeen xalay saqdii dhexe dhawaqa Hoobiyeyaasha ay Al-Shabaab la beegsanayeen Saldhiga Ciidamada Itoobiya. Weli lama xaqiijin khasaaraha Ciidamada Itoobiya iyo Dadka Shacabka kasoo gaaray weerarkan Hoobiyeyaasha ah, mana jiraan saraakiil iyo masuuliyiin ka hadlay Wararka ayaa waxaa ay intaasi ku darayaan in Ciidamada Itoobiya dhankooda ay madaafiic uga jawaabeen weerarka hoobiyeyaasha ah ee kaga yimid dhinaca Al-Shabaab. Wararkii ugu dambeeyay ee naga soo gaaray degmada Xudur ee Xarunta Gobolka Bakool ayaa sheegaya in xaaladu ay tahay mid degan.    

Bayaan ay si wada jir ay shalay u soo saareen Dowladaha Mareykanka iyo Ciraaq ayay ku xaqiijiyeen, in howlgalka ay Isbaheysiga uu Mareykanka hoggaamiyo ka wadaan ee Ciraq dhammaan doonto bisha September ee sannadka 2025-ka. Mareykanka ayaa waxaa Ciraq ka jooga ciidan gaaraya 2,500 oo askari, halka 900 oo kale ay ka joogaan dalka deriska lah Ciraaq ee Suuriya. Ciidankaan ayaa qeyb ka ah Isbaheysi la sameeyay sannadki 2014-ki, kuwaas oo dagaal la galay kooxda Daacish, oo xilligaasi Ciraq iyo Suuriya kaga dhawaaqay Khalaafo Islaami ah. Bayaanka faah-faahin dheeri ah kama bixin tirada ciidamada Mareykanka ee ka baaya Ciraq iyo saldhiga ay ka guuri doonaan. Ra’isulwasaaraha Ciraaq Maxamed Shiica Al Sudani ayaa bishii Jannaayo billaabay wadahadallada dowladaha Ciraq iyo Mareykanka ee bixista ciidamada Mareykanka. Wuxuu sheegay, in kasta oo ay mahadinayaan caawitaanka Mareykanka, ay haddana ciidamada Isbaheysiga ee jooga Ciraq boqdeen kuwo soo jiita xasillooni-darrada maadaama buu yiri ay bartilmaameed u noqdeen weeraro isla markaana ay qaadaan duqeymo jawaab ah oo aysan kala tashan dowladda Ciraq. Ciidamada Maraykanka iyo kuwa kale ee isbahaysiga ayaa la filayaa inay ku sii sugnaadaan magaalada Erbil. Waddamada kale, ee qeybta ka ah howlgalkaan ayaa isugu jira Jarmalka, Faransiiska, Spain, iyo Talyaaniga.