MW Laftagareen oo kormeeray dhismaha lagu sameynayo Terminaalka cusub ee Garoonka Shaati Gaduud.

Sida xubno xog ogaal ah ay warbaahunta maxaliga  u sheegeen, Madaxweyne Xasan Sheekh Maxamuud ayaa diiday inuu la kulmo Ra’iisul Wasaaraha Itoobiya Abiy Axmed. Xasan Sheekh iyo Abiy Axmed ayaa ku wada sugan magaalada Beijing ee dalka Shiinaha, halkaas oo ay uga qeyb galeen shirweynaha iskaashiga Shiinaha iyo Afrika. Madaxweynayaasha Jabuuti iyo Mauritania oo ay weheliyaan guddoomiyaha Midowga Afrika iyo madaxwaynihii hore ee Nigeria Olusegun Obasanjo ayaa la sheegay in ay isku dayeen in ay fududeeyaan wadahadalo ay Shiinaha ku yeeshaan Xasan Sheekh iyo Abiy Axmed. Xubnaha nala wadaagay xogtaan waxay xaqiijiyeen in Xasan Sheekh uu diiday kulankaas, balse Abiy Axmed ayaa daneynayey kulankaas. Dowladda federaalka Soomaaliya ayaa horay ugu adkeysatay in aan wax wadahadal toos ah lagala yeelan doonin Itoobiya haddii aysan Addis Ababa ka laaban is-afgaradkii sharci darrada ahaa ee maamul goboleedka Somaliland uu u saxiixay. Madaxweynaha Soomaaliya ayaa shirweynihii Beijing ka sheegay gardarada Itoobiya, wuxuuna caalamka ku wargeliyey in halista ka jirta gobolka ay sabab u tahay Itoobiya oo heshiis sharci darro ah la gashay maamul goboleed ka tirsan Soomaaliya. Dowladda Soomaaliya oo ka jawaabeysa gardarada Itoobiya ayaa heshiis difaac la gashay Masar iyo Turkiga, waxayna arrintaasi cabsi badan ku abuurtay Itoobiyaanka. Dowladda Soomaaliya ayaa Turkiga ka ogolaatay dhex-dhexaadinta Itoobiya, balse Itoobiya ayaa diiday inay bedesho mowqifkeeda, waxayna dowladda Soomaaliya qaadatay go’aan aysan wadahadal kula geleyn Itoobiya ilaa ay cadeyso inay ka laabatay heshiiskii uu Muuse Biixi u saxiixay.

Booliska dalka Sweden ayaa xaqiijiyay in la dilay ninkii ku caan baxay gubista Qur’aanka Kariimka ah, kaasoo caro weyn ka dhaliyay dunida Islaamka. Ninkan oo kasoo jeeda Masiixiyiinta dalka Ciraaq, laguna magacaabo Salwan Mumika ayaa sanadkii 2023 ilaa 4 jeer dab qabadsiiyay Kitaabka Qur’aanka Kariimka ah, iyadoo ay ilaalinayaan ciidamada Booliska Sweden. Meelaha uu Kitaabka ku gubay waxaa ka mida Masjidka weyn ee Caasimadda Sweden iyo qaar ka mida safaaradaha dowlado muslim ah, taasoo dhalisay bannaanbaxyo waaweyn oo dunida muslimka kadhacay iyo in la gubo safaaradda Sweden. Booliska dalka Sweden ayaa shaaciyay in Nin hubeysan uu galay Guriga Salwan Mumika, oo ku yaalla Xaafadda Sodertalje ee duleedka magaalada Stockholm, dalka Sweden, halkaasina uu ku dhex toogtay. Xilliga dilkiisu dhacay ayaa la sheegay inuu duubayay muuqaal Tiktok ah, waxaana dilkiisa loo qabtay 5 qof oo baaris lagu hayo. Ninkan oo 38 sano jir ahaa ayaa u dhintay dhowr rasaas oo xabadka iyo qaarka sare ee jirkiisa looga dhuftay, sida uu sheegay booliska Sweden, waxaana loogu tegay guriga iyadoo ay naftu ka baxday oo meyd ah. Salwan Mumika ayaa hore maxkamad loo soo taagay, iyadoo lagu eedeeyay inuu abuuray nacayb ka dhan ah dadka Muslimka, waxaana isaga iyo nin kale oo saaxiib la ah ay la filayey inay berri oo Jimco ah kasoo muuqdaan maxkamad. Bishii March ee sanadkii hore ayuu ninkan ka dhoofay dalka Sweden, isagoo magangalyo weydiistay dalka Norway, balse laga diiday. Taasoo keentay inuu dib ugu laabto Sweden oo laga siiyay sharci cusub, iyadoo sabab looga dhigay inuu halis ku gelayo dalkiisa Ciraaq, haddii lagu celiyo. Turkiga, Ciraaq, Iiraan iyo Dalalka kale ee islaamka ah ayaa culeys saaray Dowladaha Sweden iyo Denmark si loo joojiyo aflagaadada iyo gubista Qur’aanka kariimka, taasoo dhalisay in sharciyo cusub la soo saaro. Danmark ayaa ansixisay sharci ciqaabaya in la gubo Qur’aanka kariimka ah, halka July 2023, golaha loo dhan yahay ee Qaramada Midoobay uu si aqlabiyad ah u meel mariyay qaraar qabyo ah oo ay soo gudbisay Marooko kaasoo amraya tixgelinta Diimaha. Sida uu ku dambeeyay Masiixigii reer Ciraaq ee Salwan Mumika waxay caddeyn u tahay in dadka u gefa diinta iyo Kitaabka Quraanka ee kariimka ah aysan ku baadbadi karin goob kasta oo ay gabaad ka dhigtaan.

Safiirka Soomaaliya ee dalka Kenya Danjire Jabriil Ibraahim Cabdille oo uu wehliyo Xildhibaanka laga soo doorto Kaamakuuji ee deegaanka dadka Soomaalida degan yihiin Mudane Yuusuf Xasan ayaa Salaadda Ciidda ka dib waxa ay kulan gaar ah la qaateen dhallinta iyo waxgaradka deegaanka xaafadda Eastleigh (islii). Danjire Jabriil oo ka hadlay kulankii Hambalyada iyo ducada ee ku beegnaa munaasabadda Ciidul Adxa ayaa ku booriyay dhallinta iyo waxgaradka degaanka inay ku da’daalaan isku duubnida iyo iskaashiga. Waxa uuna ugu hambalyeeyay horumarka balaaran ee uu deegaanka Eastleigh ku tilaabsaday.