Israa’iil ayaa aroornimadi hore ee Khamiista maanta ah duqeysay batamaha magaalada Beyrut ee caasimadda Lubnaan, duqeymahaas oo la xaqiijiyay in lagu dilay ugu yaraan lix qof. Duqeynta ayaa timid saacado kaddib marki ay ciidamada Isra’il ee galay Koofurta Lubnan ay la kulmeen khasaarihi ugu cuslaa ilaa iyo hadda, kaddib marki uu millatariga Isra’il Arbacadi shalay sheegay in dagaalka Lubnan looga dilay 8 askari oo uu ku jiray sarkaal sare. Isra’il waxay sheegtay in ay xalay saqdi dhexe kaddib duqeysay bartilmaameedyo ku yaalla Beyrut. Goob joogayaal ayaa u sheegay wakaaladda wararka ee Reuters in ay maqleen daryanka madaafiic culus. Ilo wareedyo dhanka amniga ah ayaa iyaguna xaqiijiyay in meelaha la garaacay uu ku jiro dhisme ku yaalla xaafadda Bachoura oo aad ugu dhaw aqalka baarlamaanka, waana marki ugu horreysay ee ay duqeymaha cirka ah ee Isra’il u soo gaaraan agagaarka xarumaha dowladda Lubnan. Dhinaca Gaza, Wasaaradda Caafimaadka Gaza ayaa sheegtay in ugu yaraan 51 qof lagu dilay 82 kalana ay ku dhaawacmeen duqeymo cirka ah oo ay Isra’il Arbacadi ku qaadday magaalada Khan Younis. Isbitaallada Gaza ayaa sheegay in meydadka la keenay ay ku jireen 7 dumar ah iyo 12 carruur ah oo kan ugu yar uu jiray 22 bilood. Ciidanka Isra’il wali kama aysan hadlin duqeymahaasi uu dhiigga badan ku daatay.

Ra’iisul Wasaaraha Israel Benjamin Netanyahu ayaa kala diray golihii wasiirada ee dagaalka ee saameynta badnaa, kaasi oo u xil saarnaa inuu hago dagaalka Gaza, sida ay sheegeen saraakiisha Israel. Tallaabadan ayaa imaanaysa maalmo kadib markii xubin muhiim ah oo ka tirsanaa golaha uu ka baxay dowladda, sababo la xiriira niyad jabka ka dhashay qaabka uu hogaamiyaha Israel u maareeyay dagaalka. Talaabada uu maanta qaaday Netanyahu ayaa si weyn loo filayey ka dib ka bixitaankii Benny Gantz ee dowladda ee horaantii bishaan, taasi oo uu sheegay inay timid ka dib markii ay sii kordheen niyad jabka ka dhashay sida Netanyahu uu u maareeyay dagaalka. Maqnaanshaha Gantz ayaa ka dhigtay Netanyahu inuu ku tiirsanaado xulafadiisa xagjirka ah, siu u xukunka usii wado, waxaana kala dirida Golaha Wasiirada ee dagaalka ay hoosta ka xariiqaysaa in isbedel uu socdo iyadoo Israel ay sii wado dagaalka sideedda bilood ka badan socda ee Gaza. Saraakiishan, oo ka gaabsaday in magacooda la shaaciyo sababo la xiriira in aan loo ogolayn in ay warbaahinta kala hadlaan isbadalka dhacay, ayaa sheegay in hadda kadib Netanyahu uu madal kooban oo ka mid ah xubnaha dowladdiisa kala hadli doono arrimaha xasaasiga ah ee ku hareereysan dagaalka Gaza. Waxaa kuwaas ka mid ah golaha amniga, halkaasi oo xulufadiisa midigta fog ee ka soo horjeeda heshiis xabad-joojoin, islamarkaana taageersan in dib loo qabsado Gaza, ay xubno ka yihiin. Golaha Wasiirada ee dagaalka ayaa la dhisay maalmo kadib bilowgii dagaalka Gaza, markii Gantz oo ah hoggaamiyaha xisbiga mucaaradka ee siyaasadda dhexe uu ku biiray xulufada, si loo muujiyo midnimo kadib weerarkii ay Xamas ku qaaday Israel 7-dii October. Gantz ayaa dalbaday gole kooban oo yar in ay hagaan dagaalka, isaga oo isku dayaya inuu dhinac u riixo xubnaha midigta-fog ee dowladda Netanyahu. Waxa ay ka koobnaayeen saddex xubnood oo kala ah Gantz, Netanyahu iyo wasiirka difaaa Yoav Gallant, waxayna si wadajir ah u qaadan jireen go’aanada intii uu socdal dagaalka. Is-casilaadda Gantz, ayaa in kasta oo aysan halis ah toos ah ku hayn xukunka Netanyahu, waxay haddana ruxday siyaasadda Israel xilli xasaasi ah. Madaxii hore ee militariga Israel ayaa loo arkay mas’uul xoojiyey muuqaalka Israel ee saaxiibada caalamka, xilli Israel ay ku jirto xilligeedii loogu go’doominta badnaa. Dowladda Netanyahu ayaa ah tii ugu diin ay garab midigsaneyd abid. Hanaanka baarlamanka Israel ee kala qeybsanaanta badan, ayaa Netanyahu ku qasbay in uu caawimaad ka raadiyo xisbiyada yar yar ee midigta. Islamarkaana ayada oo aysan jirin taageerada xisbiga Gantz, Netanyahu ayaa waxaa qasab ku noqon kara in uu usii durqo dhanka xulufadiisa midigta, kuwaas oo marar badan ballan-qaaday inay ridi doonaan dowladda haddii aan la fulin dalabyadooda. Dadka dhaliila ayaa sheegaya in go’aanada Netanyahu ee dagaalka ay si weyn u saameeyeen xagjiriinta ku jira dowladdiisa. Netayahu ayaa beeniyey eedeymahaas, wuxuuna sheegay inuu maanka ku hayo waxa ugu wanaagsan dalka.

 Afhayeenka Amniga Qaranka ee Aqalka Cad, John Kirby ayaa sheegay inaysan danta Israel ku jirin dagaal ay haatan la gasho Ururka Xisbullah ee dalka Lubnaan. Afhayeenka oo wareysi siiyay Warbaahinta ABC ayaa sheegay in Dowladda Mareykanka ay ku howlan tahay, sidii loo baajin lahaa dagaal dhinac kastaba leh oo ka qarxa Bariga Dhexe. Afhayeenka ayaa muujiyay in Dowladda Mareykanka ay ka soo horjeeddo isku dhac ballaaran oo gobolka ah, iyadoo ay sii xoogeysanayso xiisadda ka dhalatay colaadda Gaza. Israel ayaa ku hanjabtay inay cudud militari u adeegsan doonto, sidii ay dib ugu soo celin lahayd Israeliyiinta barakaca uga maqan waqooyiga Israel, hanjabaadaas oo kordhisay xiisadda muddooyinkii ugu dambeysay ka jirtay xuduudda Israel iyo Lubnaan. Xisbullah waxay sheegtay inaysan joojin doonin weerarada ka dhanka ah Israel, inta ay Israel sii waddo weeraradeeda Marinka Gaza. John Kirby ayaa tilmaamay in Maamulka Madaxweyne Joe Biden uu sameynayo wax kasta oo isku day ah, si aan uga hortagno buu yiri in tani ay noqoto dagaal dhan walba ah oo halkaasi lagu la galo Xisbullah, kana gudba xadka Lubnaan. Afhayeenka ayaa sheegaya in ay jiraan habab aan ahayn hawlgal militari, oo horseedi kara in si nabdoon dadka Israeliyiinta ah loogu soo celiyo guryahooda. Waxa uu sheegay in wada-xaajoodka diblomaasiyadeed uu yahay kan ugu wanaagsan ee lagu dhameen karo xiisadda Israel kala dhaxeysa Xisbullah. “Waxaan aaminsanahay inay jiraan habab ka wanaagsan dagaal oo lagu isku dayo, si muwaadiniinta Israel dib loogu soo celiyo guryahooda waqooyiga iyo in kuwa halkaas jooga, si ammaan ah loo ilaaliyo, marka loo eego sii kicinta, ka dibna furin labaad laga furo halkaasi.” Ayuu yiri John Kirby. John Kirby ayaa yiri “Kordhinta militari kuma jirto danta ugu wanaagsan ee Israel. Mareykanka wuxuu rumeysan yahay in xalka diblomaasiyadeed uu weli yahay mid suurtagal ah.” Inkastoo uu Mareykanku yahay xulafada ugu weyn ee Israel, haddana ma cadda, sida uu u xakameyn karo Xukuumadda Raysal Wasaare Benjamin Netanyahu. Netanyahu ayaa la aaminsan yahay in Wasiirada xagjirka ah ee ka tirsan xukuumaddiisa ay ku riixayaan dagaalka Ururka Xisbullah. Diblomaasiyiinta shisheeye ee ku sugan gobolka ayaa ku andacoonaya in xabad joojin laga sameeyaa Gaza oo keliya ay keeni karto in xiisadda la dejiyo.