Shacabka waqooyiga Israel oo dareemay saamaynta weerarada Xisbullah.

Waxaa mar kale dalka Kenya dib uga bilowday bannaan-baxyada ka dhanka ah dowladda, kuwaas oo ka dhacay magaalooyin dhowr ah. Degmada Kitengela ee nawaaxiga koonfureed ee magaalada Nairobi, booliska ayaa si xiriir ah rasaas ugu riday jihada boqollaal qof oo mudaaharaadayay, sida uu xaqiijiyay wariye ka tirsan wakaaladda wararka ee Reuters. Dadka qaar ayaa iyaguna dhagxaan ku tuurayay booliska, halka kuwo kalana ay gubayeen taayarro. Wakaaladda wararka Rueters ayaa ku warrantay in deegaanka Kitengela lagu dilay qof ka mid ahaa dadki mudaaharaadka dhigayay. Hase yeeshee booliska oo arrintaasi wax laga weydiiyay ayaanan bixin wax jawaab ah. Bannaanbaxyada oo ay horboodayeen dhalinyaro ayaa marki hore ku billowday si nabad ah, balse markii danbe isu baddalay rabsho, sida ay xaqiijiyeen dad goob-joog ah. Dadka bannaanbaxa dhigayay ayaa ruxayay calanka Kenya kuna qeylinayay “Ruto ha baxo!”. Meelaha kale ee ay iskudhacyada booliska iyo kooxaha mudaaharaadka dhigayay ay ka dhaceen ayaa waxaa ka mid ahaa bartamaha Nairobi, halkaas oo ay ciidanka booliska adeegsadeen suntan dadka ka ilmeysiisa. Wariyaasha ayaa sheegay in dhowr qof lagu dhaawacay isku hor-imaadyada booliska iyo bannaanbaxayaasha ee Nairobi. Bannaan-baxyo kuwan lamid ah oo Kenya ka dhacay bishii hore ayaa waxaa ku dhintay ugu yaraan 50 qof, halka ay ku dhaawacmeen boqollaal kale.

Ra’iisul Wasaarihii hore ee Israel, Ehud Barak ayaa rajo xumo ka muujiyay in la xaqiijin karo guusha ay raadinayaan Ra’iisul Wasaare Benjamin Netanyahu iyo Wasiirada xagjirka ah ee ka tirsan xukuumaddiisa. Ra’iisul Wasaare Netanyahu iyo Wasiirada mayalka adag ayaa isku dhaarsaday in la sii wado dagaalka ay ciidamadu kaga jiraan Marinka Gaza, illaa iyo inta laga wiiqayo awoodda militari ee Xamaas. Ehud Barak, Ra’iisul Wasaarihii hore ee Israel ayaa sheegay in Israel ay wajaheyso waqti adag, kaas oo keeni kara burburka Israel, haddii aan si dhakhsa ah loo soo afjarin colaadda Gaza. Waxa uu sheegay in Israel ay kala daadaneyso, isla-markaana aysan muuqan wax istiraatiijyad ah ama qorshe dagaal, oo xukuumaddu ay ka leedahay dagaalka galay bishii 12-aad. Waxa kaloo uu sheegay in Israel aysan suurtagal ahayn inay guul dhameystiran ka gaarto dagaalkan, si ka duwan taasina ay iyadu qarka u saaran tahay guuldarro. “Xaqiiqadu waa adag tahay. Israel ma aysan guuleysan October 7-deedii, kumana guuleysan doonto dagaalka ka socdo Gaza. Dhab ahaantii waxaan ku dhownahay guuldarro, intii aan guuleysan lahayn,” ayuu yiri Ehud Barak. Ehud Barak oo wareysi siiyay Wargeyska Israel Hayom ayaa ka digay burburka Isreal, isagoona Netanyahu iyo kooxdiisa ugu baaqay inay qaataan heshiiska nabadda ee lagu soo afjarayo dagaalkan, xitaa haddii xabsiga laga sii wada deynayo dhammaan maxaabiista Falastiiniyiinta. “Israel waxay u baahan tahay inay u diyaargarowdo in la joojiyo dagaalka Gaza, si looga hortago xaalad kale, iyada oo loo marayo heshiiska maxaabiis is dhaafsiga.” Ayuu yiri Barak. Barak ayaa intaasi ku daray “Heshiiska ayaa keeni kara in la dejiyo xaaladda iyo inay hoos u dhacaan weerarada Xisbullah, xitaa haddii heshiisku uu yahay mid ku-meel-gaar ah.” Netanyahu iyo Wasiirada midigta fog ayaa dhegaha ka fureysanaya baaqyada joogtada ah ee uga imanaya shacabka Israel, siyaasiyiinta iyo Saraakiisha Ciidamada ee ku talinaya in la joojiyo dagaalka, si la haysteyaasha Israeliyiinta ee lagu haysto Gaza loo soo sii daayo.

Xoogaga wax iska caabinta Ciraaq (IRI) ee Iran taageerto ayaa caawa sheegtay masuuliyadda weerar diyaarado drones ah loo adeegsaday oo lagu qaaday Magaalada Eilat ee ay Israel horey uga qabsatay Falastiiniyiinta. Xoogaga IRI oo qayb ka ah kooxaha Islaamiyiinta ee Iran bari-taarto ayaa bayaan ay soo saareen ku sheegay in weerarkan ay ku garab taagan yihiin shacabka Falastiin iyo Lubnaan ee la kulmaya weerarada Ciidamada Israel. “Waxaan maanta weerarnay bartilmaameed muhiim ah oo ku yaala Magaalada Umm Al-Rashrash (Eilat) ee la haysto, iyada oo la adeegsanayo diyaaradaha aan duuliyaha lahayn.” Ayaa lagu yiri bayaanka. Bayaanka ayaa lagu sheegay “Waxaan sii wadaynaa hawlgalada aan ku garab taaganahay walaalahayaga Falastiin iyo Lubnaan, waxaana diyaar u nahay inaan ka jawaabno xasuuqa ay ciidamada gumeystaha ku hayaan dadka rayidka ah ee leh carruurta, haweenka iyo dadka da’da ah.” Afhayeenka Ciidamada Israel, Daniel Hagari ayaa xaqiijiyay in laba ka mid ah drones-ka is qarxiya lagu soo weeraray magaalada, isagoona sheegay in mid ka mid ah la qabtay, kan labaadna uu ku dhacay Dekedda Eilat. “Seeriga digniinaha ayaa laga maqlay Eilat, ka dib markii ay gudaha u soo galeen laba diyaaradood oo drones ah. Markab ay Ciidanka Badda Israel leeyihiin ayaa mid ka mid ah qabtay, halka kii labaadna uu ku dhacay Dekedda Eilat. Dhaawac fudud ayaa ka dhashay weerarka.” Ayuu yiri Afhayeenka. Wargeyska Yedioth Ahronoth ayaa qoray in diyaaradda labaad ay ku qaraxday Dekedda Eilat, ka dib markii nidaamka difaaca hawada ee Israel uu ku guuldareystay inuu ka hortago. Wargeyska ayaa ku waramay in laba qof oo Israeliyiin ah ay ku dhaawacmeen weerarka. Afhayeenka Ciidamada Israel ma xaqiijin cidda ka dambeysay weerarka, waxaase uu sheegay in baaritaan uu socdo. Isagoo Wariyeyaasha la hadlayay, waxna laga weydiiyay in weerarka lagaga soo qaaday dhinaca dalka Ciraaq iyo inay weerar ku qaadayaan dalkaasi ayuu ku jawaabay “Waxaan la soconaa khatarta Ciraaq, waxaanu eegaynaa inta aanu ku guda jirno qiimeynta xaaladda iyo xog uruurinta. Waxaan samayn doonnaa wax kasta oo lagama maarmaan ah, si aanu wax uga qabano xaaladda.” Weerarka Arbacadan lagu qaaday Dekedda Eilat ayaa yimid, ka dib markii Ururka Kataib Hezbollah oo kan ugu weyn Ciraaq ah uu kooxaha kale ee dalkaasi ugu baaqay in la kordhiyo weerarada ka dhanka ah Israel. Ururka Kataib Hezbollah ee Ciraaq ayaa daba-yaaqadii bishii October bilaabay inay weeraraan saldhigyada ay Ciidamada Mareykanka ku leeyihiin dalkaasi, iyadoo laga jawaabayo taageerada militari iyo midda maaliyadeed ee Mareykanka uu siiyo Israel. Xuuthiyiinta Yemen ayaa marar badan gantaalo iyo diyaarado drones ah ku weeraray magaaladan, oo horey loo oran jiray Umm Al-Rashrāsh, balse ay Israel ugu magac-dartay Eilat, taas oo ka mid ah magaalooyinka laga xoogay Falastiin ee Israeliyiinta la soo dejiyay. Colaaddan ugu dambeysay ee ka dhex qaraxday Israel iyo Ururka Xisbullah ee dalka Lubnaan ayaa la qiyaasaya inay ka saamayn badnaan doonto dagaalka Ciidamada Israel iyo Xoogaga Xamaas ku dhex maraya Marinka Gaza.