Dhimashada weerarada Israel ee Lubnaan oo gaartay 274 qof.

Madaxweyne Joe Biden ayaa ku dhowaaqay in aanu mar kale u tartami doonin xilka madaxweynaha Mareykanka, isaga oo soo afjaray ololihiisa dib u doorasho. Biden ayaa qoraal uu soo dhigay barta X ku sheegay inuu sii wadi doono xilkiisa madaxweynaha Mareykanka iyo taliyaha guud ee ciidamada, illaa muddo xileedkiisa uu ka dhammaanayo bisha Janaayo ee 2025. Waxa uu intaas ku daray inuu qaranka la hadli doono toddobaadkan. “Waxay ii ahayd sharaftii ugu waynayd nolosheyda in aan noqdo madaxweynihiina. Islamarkaana in inkasta oo ujeedkaygu ahaa in aan mar labaad isku soo sharaxo, waxa aan aaminsanahay in ay dani ugu jirto xisbigayga iyo dalkaba in aan ka haro, oo aan diiradda saaro oo kaliya fulinta waajibaadkeyga madaxweynenimo inta ka hartay muddo xileedkayga,” ayuu qoray Biden. Ka-haritaanka tartanka ayaa dhabbaha u xaaraya ku-xigeenkiisa Kamala Harris inay noqoto gabadhii ugu horreysay ee madow ah ee xilka madaxweyne u tartanta. Biden oo 81 jir ah kuma qeexin magaca Harris warqaddii uu ugu dhowaaqay go’aankiisa. Sioo kale ma cadda haddii xubnaha sare ee Dimoqraadiga ay Harris kula loolami doonin magacaabista musharaxa madaxweyne ee Dimoqraadiga, iyo in xisbiga dooran doono in tartanka laga dhigo mid cid kasta u furan iyo in kale. Go’aanka Biden ayaa daba socda mowjado cadaadisyo shaacsan iyo kuwa qarsoon ah oo kaga yimid sharci-dejiyayaasha iyo saraakiisha Dimoqraadiga oo ahaa inuu tartanka ka haro kadib bandhiggii xumaa ee uu ka muujiyey dooddii uu la galay musharraxa Jamhuuriga Donald Trump.

Wararka ka imanaya dalka Lubnaan ayaa sheegaya in ay cabsi xoog leh soo wajahday Ciidanka Nabad Ilaalinta Qaramada Midoobey ee Lubnaan (UNIFIL) ee ku sugan aagga xuduudda ee Lubnaan iyo Israel. Ciidanka UNIFIL ayaa dhexda uga jira gantaalaha xoogan ee isaga gudbaya xuduudda, iyagoona mar kasta halis ugu jira inay ku dhintaan amaba ay ku dhaawacmaan duqaymaha Israel, oo ah kuwo aan loo meel dayeynin. Warbaahinta gobolka ayaa sheegeysa in mararka qaarkood ay gantaalaha ku soo dhacayaan aagga khadka buluugga ee xuduudda, oo ah goobta ay ku sugan yihiin Ciidanka Nabad Ilaalinta Qaramada Midoobey. Hawlgalka Qaramada Midoobey ee dalka Lubnaan ayaa codsaday in la dejiyo xiisadda Israel kala dhaxeysa Ururka Xisbullah. Taliska UNIFIL ayaa sidoo kale muujiyay walaaca ay ka qabaan badqabka dadka rayidka ah ee ku sugan koonfurta Lubnaan. Taliska ayaa sheegay in Taliyaha Hawlgalka UNIFIL, General Aroldo Lázaro uu la xiriiray labada dhinac, isla-markaana uu kala hadlay baahida degdegga ah ee loo qabo in hoos loo dhigo xiisadda. “Xaaladdan khatarta ah oo sii korodha waxay yeelan kartaa cawaaqib xumo.” Ayaa lagu yiri war qoraal ah oo ka soo baxay Taliska UNIFIL. Warka ayaa lagu sheegay “Weerarada ka dhanka ah dadka rayidka ah waxay xadgudub ku yihiin sharciga caalamiga ah, waxay sidoo kale noqon karaan dembiyo dagaal.” Diblomaasiyiinta shisheeye ee ku sugan Bariga Dhexe ayaa laga soo xigtay in khatarta jirto ay keeni karto in dagaalku uu fido, haddii aysan diblomaasiyaddu shaqeyn. Diblomaasiyiin aan magacyadooda la sheegin ayay Warbaahinta caalamka iyo tan gobolkaba ka soo xiganeysaa in heerka khatarta ay gaartay meeshii ugu sarreysay, tan iyo 8-dii bishii October oo Israel iyo Xisbullah ay ku lug lahaayeen gantaalaha isaga gudba soohdinta labada dal. Afhayeenka Wasaaradda Arrimaha Dibadda Mareykanka, Matthew Miller ayaa qiray in dhacdooyinka ka jira xuduudda ay dhabaha u xaarayaan in xaaladdu ay faraha ka baxdo. Afhayeenka ayaa qaba in colaadda labada dhinac lagaga gudbi karo, dhinacyada oo khilaafkooda ku xaliya wada-xaajood diblomaasiyadeed. Hoggaamiyaha Ururka Xisbullah, Hassan Nasrallah ayaa Khamiistii sheegay in dawada xiisadda gobolka ay tahay in la joojiyo dagaalka Israel ka waddo Marinka Gaza, taasoo ay Tel Aviv ka biyo diidan tahay. Israel ayaa ku gorgortameysa, haddii la doonayo inay qaadato heshiiska xabad joojinta Gaza in ay Xamaas aqbasho in Ciidamada Israel ay sii joogaan Waddada Philadelphi ama Philadelphi Corridor ee ku taala xadka Marinka Gaza iyo Masar. Israel ayaa sumcad xumo u aragto in ciidamadeeda ay ka soo saarto Marinka Gaza, iyadoo aan laga adkaan Ururka Xamaas amaba aysan jirin shuruudo ay ciidamada qaybtood ku sii joogi karaan dhulka ay colaaddu halakeysay. Xamaas waxay dhankeeda ku adkeysanaysaa inay diyaar u tahay oo keliya in ay dhaqangeliso xabad joojin ka madaxbannaan shuruudo cusub. Dagaalka Gaza oo sanad ku dhow ayaynaan Israel illaa iyo hadda xaqiijin saddexdii hadaf ee ay ugu duushay dhulka go’doonsan. Israel ayaa Gaza ugu duushay in la wiiqo cududda militari ee Xamaas, dib u soo celinta Israeliyiintii lagu qafaashay weerarkii October 7-deedii iyo inaysan Gaza mustaqbalka khatar amni ku noqon Israel.

Wasiirka Difaaca Israel, Yoav Gallant ayaa ku goodiyay in Israel ay sii wadi doonto hawlgalada ka dhanka ah Ururka Xisbullah ee ka arrimiya koonfurta dalka Lubnaan. Wasiirka ayaa sheegay in Xisbullah ay hadda dareentay sida uu yiri mid ka mid ah awooddeenna, ka dib weeraradii Talaadadii iyo Arbacadii lagu qarxiyay qalabka isgaarsiinta ee Xisbullah iyo aaladaha kale ee ay isticmaalaan shacabka dalkaasi. Wasiirka oo booqday Xarunta Taliska Ciidanka Cirka Israel, soona hadal qaaday duqayntii aan caadiga ahayn ee Xisbullah shalay ka gaysatay deegaanada waqooyiga Israel ayaa ku hanjabay in taasi ay keeni doonto in Tel Aviv ay jawaab adag ka bixiso. “Israel waxay sii wadi doontaa hawlgalada ka dhanka ah Xisbullah, illaa kooxda argagixisada ay ka ogolaaneyso in dadka barakacayaasha ah ay dib ugu soo laabtaan guryahooda.” Ayuu yiri Wasiirka Difaaca Israel. Wasiirka oo sii hadlayay ayaa waxa uu yiri “Tallaabooyinkani way sii socon doonaan illaa aan ka gaarno xaalad aan si ammaan ah guryahooda ugu soo celino dadka degan waqooyiga.” Wasiir Gallant ayaa intaasi raaciyay “Waxaan samayn doonnaa wax kasta oo lagama maarmaan ah, si aan tani u xaqiijino.” Dhanka kale Taliyaha Ciidamada Israel, General Herzi Halevi oo isna booqday Saldhigga Ciiidanka Cirka Tel Nof ee bartamaha Israel ayaa sheegay in ay tallaabo ka qaadi doonaan Xisbullah, haddii ay is hortaag ku sameyso qorshaha ay damacsan yihiin in ay Israeliyiinta dib ugu soo celiyaan guryahooda waqooyiga. “Waxaan si badbaado leh ugu celin doonnaa guryahooda dadkii qaxay, haddii Xisbullah aysan weli fahmin tan, waxay yeelan doontaa dharbaaxo kale, illaa ay ka fahmaan.” Ayuu yiri Taliyaha oo intaasi ku daray “Weeraradeennu way kordhi doonaan.” Taliyaha ayaa ka digay in Israel ay adeegsan doonto awood dheeri ah, waana xilli sida uu sheegay ay Israel diyaargarow weyn ugu jirto weerar iyo difaac, labadaba. Madaxda Israel ayaa toddobaadkii hore bilaabay inay baahiyaan in ay si xoog ah dadkooda ugu soo celin doonaan waqooyiga Israel. Israeliyiintan ayaa ka cararay deegaanada waqooyiga ee ku dhow dhow xadka Lubnaan, ka dib in ka badan 11 bilood oo Israel iyo Xisbullah ay ku lug lahaayeen gantaalo si maalinle ah isaga gudba xuduudda labada dal. Hoggaamiyaha Ururka Xisbullah, Hassan Nasrallah ayaa Khamiistii sheegay inaysan Israel suurtagal u noqon doonin in ay Israeliyiintu ku soo noqdaan waqooyiga, inta uu socdo dagaalka Marinka Gaza. Nasrallah ayaa ka digay in Israel ay ballaariso dagaalka, haddii kalene ay taasi horseedi doonto in Israeliyiin kale ay oodda jabsadaan.