Dulsar TV

Dacwaddii loo haystay nin lagu eedeeyey inuu lacag ka dhacay DFS oo la laalay.

Maxkamad federal oo Mareykan ah ayaa laashay kiis dacwadeed ay dowladda Mareykanka kusoo oogtay qareen degan gobolka Maryland, oo ku eedeysnaa inuu dhacay hantida dowladda Soomaaliya.

Jeremy Wyeth Schulman, oo ah 48 jir, ayaa December 2020 lagu soo oogay dacwado la xiriira inuu ku lug yeeshay qorshe si khiyaano ah looga soo qaaday hay’ado maaliyadeed lacag gaareysa 12.5 milyan oo dollar, oo ka mid ah hantida dowladda Soomaaliya, islamarkaana uu boqolaal kun oo dollar siiyay shirkad sharci oo qaadatay in ka badan 3 milyan oo dollar oo lacagtaas ka mid ah.

Dacwadaha loo haystay Schulman ayaa waxaa ka mid ahaa musuq-maasuq banki, been xalaaleyn lacag, iyo lacago si sharci-darro ah la isaga gudbiyey banki.

Si kastaba, garoosre Paula Xinis, oo ah xaakimka maxkamadda federaalka Mareykanka ee degmada Maryland, ayaa Jimcihii shalay laashay kiiska ka dhanka ah Schulman kadib markii ay sidaas codsatay dowladda Mareykanka, oo ka laabatay dacwadda oo soo socota muddo saddex sano ka badan.

Warqadda kasoo baxday garsooraha laguma shaacin sababta ay dowladda Mareykanka u codsatay in kiiska la laalo.

Dacwadda markii hore lagu soo oogay Schulman iyo xubno kale ayaa waxaa ka mid ahaa; in ay isku dayeen inay si sharci-darro ah gacanta ugu dhigaan maamulka boqolaal milyan oo dollar ah oo ka mid ah hantida Bankiga Dhexe ee Soomaaliya, ee taalla bankiyada caalami ah, taasi oo la hakiyey markii ay burburtay dowladdii dhexe ee Soomaaliya 1991-kii.

Sida ku xusneyd dacwadda la laalay, Schulman ayaa bankiyadaas u geeyey dokumentiyo lagu sheegay in la been-abuuray, si uu gacanta ugu dhigo maamulka malaayiin dollar oo ah hantida dowladda Soomaaliyeed, intii u dhaxeysay 2010 illaa 2014.

Schulman ayaa sidoo kale lagu eedeeyey inuu boqolaal kun oo dollar oo magdhow ah ka qaatay shirkad sharci, taasi oo si aan sax aheyn u qaadatay 3.3 milyan oo dollar oo ka mid ah lacagta dowladda Soomaaliya.

Schulman ayaa horey dowladda federaalka Soomaaliya ugu matalay kiisas dhowr ah, oo ay ka mid yihiin baaritaanka eedeymo musuq-maasuq oo ay soo jeediyeen kooxda QM ee kormeerka Soomaaliya iyo Eritrea (UN Monitoring Group for Somalia and Eritrea).

Related Posts

Heshiiskii Golaha Wadatashiga qaranka oo buriyay Ahmed modoobe iyo laftagareen, iskuna Rogay Hassan sheekh Maxamuud.

Buuqa ka dhashay qorshahay ay xukuumadda federaalka ah ku dooneyso inay ciidanka Itoobiya uga saarto dalka ayaa weli taagan. Labada hoggaamiye ee Koonfur Galbeed iyo Jubbaland, Cabdicasiis Lafta-gareen iyo Axmed Madoobe ayaa la sheegay inay si buuxda markii hore u aqbaleen qorshaha xukuumadda ee bixitaanka ciidamada, balse ay isbeddeleen markii ay deegaanadooda ku laabteen. Shirkii ugu dambeeyay ee Golaha Wadatashiga Qaran waxaa la xasuusto in hal maalin la siiyay sharaxaad amni oo ay soo diyaariyeen xafiiska la-taliyaha amniga qaranka iyo wasaaradda gaashaandhiga. Qeyb kamid ah sharaxaadaas waxay ka hadleysay bixitaanka ATMIS iyo sida ay dowladda damacsan tahay in loo maareeyo deegaanada ay ka baxayaan ciidanka, gaar ahaan deegaanada ay ka baxayaan kuwa Itoobiyaanka. La-taliyaha Amniga Qaranka ee madaxweynaha Soomaaliya oo wareysi bixiyay ayaa sheegay inay labadaasi maamul wax ka gaareen go’aanka ayna aqbaleen sida loo qorsheeyay fulinta bixitaanka ciidanka Midowga Afrika. Dowladda federaalka waxay sheegtay in aanu qorshuhu aheyn in goobaha ay baneyn doonaan ATMIS inay la wareegto argagixisada, balse taas beddelkeeda uu socdo qorshe kale oo lagu geynayo ciidamo kale oo ka socda Midowga Afrika. Midda gaarka la iskugu hayo oo ah Itoobiyaanka wuxuu La-taliyaha amniga ee madaxweyne Xasan Sheekh ku adkeystay inay Itoobiyaanka ka baxayaan dalka wixii ka dambeeya 31 December ee sanadkaan, oo aanay dalka sharci iyo sharci darro midna kusii joogi doonin. Hal shardi ayaa jira oo Itoobiyaanka qeyb kaga ahaan karaan ciidanka cusub ee kasii howl-gali doona Soomaaliya, kaasina waa inay ka laabtaan heshiiska ay la galeen Somaliland ee la xiriira arrimaha badda. In Lafta-gareen iyo Axmed Madoobe oo qeyb ka ahaa heshiiska lagu bixinayo ciidanka shisheeye inay dib iska beddelaan waxaa lagu fasiri karaa mid muujinaysa saameynta ay Itoobiya ku leedahay gudaha dalka. Koonfur Galbeed iyo Jubbaland waa labada maamul goboleed ee ugu badan ee ay joogaan ciidanka Itoobiya. Hoggaamiyaha maamulka Koonfur Galbeed Cabdicasiis Lafta-gareen wuxuu dorraad la kulmay taliska ciidanka Itoobiya ee ku sugan magaalada Baydhabo, iyaga oo ka wada-hadlay xaaladda amniga ee deegaanada Koonfur Galbeed iyo sida loo sii dardar-gelin karo. Kulanka Lafta-gareen iyo Itoobiyaanka ayaa muujiyey sida uu maamulka Lafta-gareen u diidan yahay inay Itoobiyaanka baxaan. Marka halka sharciga caalamiga ah la eego waa adkaan doonta inay ciidanka Itoobiya iska joogaan Soomaaliya, oo ay diidaan amarka dowladda federaalka ee Soomaaliya. Mana cadda inay dhinaca kale aqbali doonaan shuruudda lagu xiray ee ah inay ka laabtaan heshiiska ay la galeen Somaliland, si uu ciidankooda uga sii howl-gallo Soomaaliya oo ay sheegeen in haddii ay kasoo wada baxaan inay halis ugu jiraan in argagixisada ay gudaha usoo gasho dalkooda.  

IMAARAADKA OO QAADAY TALLAABO CULUS OO LA XIRIIRTA SOOMAALIYA.

Dowladda Isu Tegga Imaaraadka Carabta ayaa maanta qaaday tallaabo culus oo ay ku xoojineyso xiriirka Soomaaliya, waxaana maanta xafiis cusub oo muhiim u ah xiriirkaas ka furtay magaalada caasimada ah ee Muqdisho. Safiirka Imaaraadka u qaabilsan arrimaha Soomaaliya, Axmed Jumca Rumeythi ayaa maanta magaalada Muqdisho ka daah-furay xarunta bixinta dal ku galka, taas oo hadda kadib dadka Soomaaliyeed ay ka qaadan doonaan visaha. Danjire Axmed Jumca Rumeythi ayaa shaaca ka qaaday in furitaanka xaruntan ay kamid ka tahay xoojinta xiriirka Soomaaliya iyo Imaaraadka Carabta, ayna ka go’an tahay inay sii hormariyaan iskaashiga ka dhexeeya labada dhinac. Xaruntan cusub ayaa waxa waxa ay noqonaysaa qunsuliyaddii ugu horreysay oo Imaaraadka Carabta ka furo magaalada Muqdisho tan iyo burburkii dalka kadib. Imaaraadka ayaa kamid ah dowladaha Carbeed ee haatan xiriirka wanaagsan la leh dowladda federaalka, wuxuuna xiriirka sii ballaartay kadib dib u doorashadii madaxweyne Xasan Sheekh Maxamuud ee 15-kii May sanadkii 2022-kii. Dowladda Imaaraadka ayaa Soomaaliya ka taageerto dhinacyada dhaqaalaha, bani’aadanimada iyo ciidamada, waxayna saldhig ku leeyahay magaalada Muqdisho, kaas oo ay joogaan saraakiil sar sare oo tababaro siiya ciidamo ka tirsan dowladda.

SABABTA LOO AAMINI LA’YAHAY GO’AANNADA DFS OO UU HOGAAMINAAYO DR XASAN SHEEKH MAXMUUD.

 Dowladda federaalka ee Soomaaliya ayaa dhawaan koox Culimo ah oo dowladda la shaqeysa geysay qabuuraha Iskuul Buluusiya, oo ay dowladda rabto inay dhul ahaan u qaadato. Halkani oo kumanaan ruux ku aasan yihiin ayay dowladda si rasmi ah u amartay in maydadka lagala baxo. Waxaa u fatwoodday in maytadaas dib loo soo faago culimo ay kamid yihiin Sheekh Cali Wajiis iyo Sheekh Bashiir Axmed Salaad oo kamid ah culimada dowladda xiriirka furan la leh ama sida uu Cali Wajiis dhowr jeer sheegay ay qaar la-taliyeyaasha u yihiin. Dhulkaan oo kal hore laga saaray maydka Allaha u naxariiste Majaajilistihii caanka ahaa ee Cabdi Muriidi Dheere Ajakis ayaa xilligaas dowladda iyada oo fadeexad ka carareysa waxay reerka Ajakis ku qasabtay inay arrinta ka dhigaan go’aan ay reerka si iskood ah u qaateen, laakiin ugu dambeyn dowladda waa soo bareertay shalay. Dadka ehelkooda halkaa ku xabaalan yihiin waxaa loo qabtay toban cisho inay kula baxaan maydadka. Wasaaradda gaashaandhiga Soomaaliya iyo maamulka gobolka Banaadir ayaa halkaa ku wehliya culimadda gacan-saarka la’leh dowladda. Dhawaqa arrintaan ayaa gil-gilay shacabka Soomaaliyeed si aan hore loo arag ayaana loogu dhalleeceyay madaxweyne Xasan Sheekh tallaabadan lagu saarayo maydadkii halkaas lagu aasay 30-kii sano ee lasoo dhaafay. Dowladda waxay sheegtay inay halkaas u rabto inay ka dhisto xarun ciidan, gaar ahaan ciidanka badda, laakiin dadweynaha waxa ay ku doodayaan inay dowladda heli kartay dhul kale oo badda saaran oo ciidanka la dejiyo, waaba haddii ay dhab tahee. Waxaa jira dhulal badan oo badda saaran ama u dhow oo dowladda ay leedahay oo ay xoog ku haystaan siyaasiyiin iyo ganacsato. Laakiin dowladda waa u bareeri weysay dhinacyadaas, waxaana u sahlanaatay meytada. Inta badan dadweynaha ma aqbalaan wax walba oo dhul ku saabsan marka uu xukunka joogo madaxweyne Xasan Sheekh Maxamuud. Inkasta oo wasiirka gaashaandhiga sheegay in halkaas ciidanka badda loo dhisi doono, haddana shacabka weli ma liqin middasi. Haddii aad isweydiinayso sababta aan marka madaxweyne Xasan Sheekh xukunka hayo aan loo aaminin waxkasta oo dhulalka ay ka tiraahdo dowladdiisa, waa dhacdooyin hore oo dhulal la xiriiray oo si qaldan loo maareeyay. Horey waxaa u dhacday dhulal ay dowladda lahaan jirtay oo dad shacab ah laga saaray, oo markii horena doonistooda laga dhigay inay dowladda isticmaali doonto in kadib la qeybsaday oo ganacsato iyo siyaasiyiin laga iibiyay, taasina waxay dhashay in aanay marnaba dadweynaha aaminin sababaha ay dowladda sheegto inay dhulalka u rabto oo tii qabuuraha Iskuul Buluusiya ugu dambeysay. Madaxweyne Xasan Sheekh Maxamuud ayaa weli dhexda uga jira dhacdooyinka quusta badan ee dhulalka la xiriira, kuwaas oo weli dadweynaha kasii niyad-jabinaya xukunkiisa.    

Leave a Reply

Your email address will not be published. Required fields are marked *