AS iyo ciidamada ATMIS oo dagaal culus uu ku dhex-maray Buulo-mareer.

Wararka naga soo gaaraya helayo gobolka Galgaduud ee bartamaha Soomaaliya ayaa sheegaya in maanta carruur walaalo ah ay miino kula qaraxday magaalada Xeraale ee gobolkaasi, waxaana soo gaaray dhimasho iyo dhaawac. Carruurta oo ahaa laba wiil iyo gabar  ayaa midka u weyn da’ahaan jiray 6 sano, waxaana ku qarxay miino ay ku ciyaarayeen, sida ay innoo sheegeen dadka deegaanka. Laba kamid ah carruurta ayaa goobta ku geeriyooday, halka mid kale dhaawac culus oo soo gaaray saacado kadib uu isna ku dhinatay isbitaal ku yaalla magaalada Xeraale. Mid kamid ah dadka deegaanka oo la hadlay warbaahinta ayaa sheegay in falkan uu ku reebay argagax wayn, isla markaana ay soo wajahday cabsi xoogan oo la xiriirta haraadiga hubka iyo walxaha qarxa oo dhulkaasi ku badan, maadaama ay ka jiraa dagaallo iyo colaado sokeeye. “Meeshan waxaa ka dhacday ciyaal-baa miino ku qaraxday, miinada illaa iyo hadda meel ay ka keeneen lama yaqaano, hadda waxaan ku jirnaa aaska saddexda carrruuta ah” ayuu yiri. Dhinaca kale ma jiro illaa iyo hadda wax war ah oo kasoo baxay maamulka degmada iyo saraakiisha laamaha amniga Galmudug oo ku aadan dhacdadaasi xanuunka badan. Soomaaliya waxaa inta badan la soo wariyaa waxyeello ka dhalata haraadiga hubka aan weli qarxin iyo miinooyinka dhulka lagu aaso oo ay dhibaato ka soo gaarto shacabka. Si kastaba, tan iyo dagaallada sokeeye ee wadanka ka dhacay, waxaa la arka haraadiga hubkii lagu dagaalamay oo yaallo goobo kala duwan, taasi oo inta badan ay khasaare kala kulmaan carruurta yar yar ee Soomaaliyeed.

Maleeshiyaad hubeysan ayaa Gaari ku rasaaseeyay wadada u dhaxeysa degmooyinka Cabudwaaq iyo Balanbale ee Waqooyiga Gobolka Galgaduud, waxaana ka dhashay khasaaro isugu jira dhimasho iyo dhaawac oo soo gaaray dadkii saarnaa Gaariga. Gaariga oo ka baxay degmada Cabudwaaq ayaa lagu rasaaseeyay degaanka Ceelasha biyaha, waxaana inta la xaqiijiyay ku geeriyooday Wiil Dhalinyaro ahaa oo lagu Magacaabi jiray Liibaan Gaarane ooo kamid ahaa ilaalada Gaarka ah ee Madaxweyne ku xigeenka Galmudug Cali Daahir Ciid, halka ay ku dhaawacmeen Saddex Ruux oo kale. Ciidamo katirsan laamaha Amniga Galmudug ayaa tegay Goobta uu weerarka ka dhacay, iyaga oo halkaasi ka sameeyay howlgallo ay ku baadi goobayeen maleeshiyaadkii weerarkaasi geystay, wallow aysan gacanta ku dhigin. Wararka Dulsar TV ay heleyso ayaa waxaa ay intaasi ku darayaan in weerarkaasi uu la xiriira dhacdooyin aanooyin qabiil ah oo dhowrkii sano ee la soo dhaafay ka taagan degaano iyo degmooyin katirsan Gobolka Galgaduud ee Maamulka Galmudug. Si akstaba dhowrkii sano ee la soo dhaafay degaannada Mamaulka Galmudug ee Gobolada Mudug iyo Galgaduud waxaa ka dhacayay colaad Beeleedyo soo laab laabtay iyo dilal aanooyin qabiil ah, iyada oo Madaxda Galmudug ay ku fashilmeen inay wax ka qabtaan.

Wasiirka gaashaandhiga Soomaaliya Cabdulqaadir Maxamed Nuur (Jaamac) ayaa si jees-jees ah uga jawaabay Xildhibaan Dayax Cumar oo ka tirsan Golaha Shacabka oo maalmihii dambe ay isku weerareen baraha bulshada. Labada nin oo maalmahan ay xiisad xooggan ka dhaxeysay ayaa isku qaaday weerar afka ah, ayada oo wasiir Jaamac uu kasoo jawaabay qoraal uu ku weeraray Xildhibaan Dayax, kaasi oo uu ku sheegay in wasiirka ay ku hayaan booska wasaaradda gaashaandhiga dowladdo shisheeye iyo dano gaar ah. “Soomaali way ogtahay in aadan lahayn aqoon iyo waayo aragnimo aad ku noqoto wasiir difaac hase yeeshee waxaysan ogeyn in dowlado iyo dano gaar ah meesha kugu hayaan,” ayuu xildhibaanka ku yiri qoraal uu ku weeraray wasiir Jaamac. Wasiirka gaashaandhiga ayaa weerarkan uga jawaabay “si jees-jees ah” isaggoo Dayax ku tilmaamay mid aan caqli badan laheyn oo ay kasoo dhex hadlayaan siyaasiyiin kale oo banaanka iman karin, sida uu hadalka u dhigay. “Mudane Afhayeen waan jeclaan lahaa Odayaasha ku soo direy iney laamiga soo istaagaan isna cadeeyaan iney raali ka yihiin in Ethiopia qaadato dhul iyo Bad Soomaaliyeed, kumase dhacaane,” ayuu yiri wasiir Jaamac. Waxa uu intaas kusii daray “Adiga waxaan kugula talin lahaa inaad masaasadaadii iyo abuu-waladkaagi isaga laabato, una sheegtid iney iyagu laamiga yimaadaan. Somaaliya Soomaali baa leh.” Halkee ayey kasoo bilaabatay xiisadda labada nin. Labadaan nin ayaa sida muuqata uu ka dhaxeeya xilaaftan siyaasadeed muddo huursanaa, ayada oo ay isku qabteen hanaanka hoggaamineed ee wasaaradda difaaca iyo dagaalka Itoobiya. “Sidee Ethiopia ugu adkaan karnaa? Markaa adigoo TikToker ah aad wasiir difaac noo tahay, waliba aad dumin sare ku hayso ciidanka xooga dalka Soomaaliyeed. Cajiib,” ayuu yiri Xildhibaan Dayax oo maalmo kahor ka fal-caliyay jawaab uu wasiirka ka bixiyay qoraal wasiir Itoobiyaan ah uu ku sheegay inay aqoonsanayaan Somaliland. Wasiirka oo kasoo jawaabay qoraalka Xildhibaanka ayaa wuxuu weydiiyay xilliga uu noqday afhayeen Ethiopia, isagoo kusoo hal qabsaday xildhibaankii hore ee kursigaan ku fadhin jiray. “Xildhibaane kursigaa ku fadhido hogaamiye Maxamed Qanyare Afrax oo qadiyadaha Soomaalinimada ahmiyad u leedahay ayaa ku fadhin jirey, adigu goormaa afhayeen Ethiopia noqotey? Cajiib,” ayu Jaamac ku yiri qoraal ugu jawaabay Dayax. Markale ayuu haddana Xildhibaan Dayax usoo jawaabay Wasiir Jaamac, wuxuuna yiri “Horta adigu meeqo Jaamacaa tahay?!. Nin haduu dadkiisa iyo dalkiisa dhagar ka galo, si kasta oo uu daruuraha ama dayaxo u koro. nabsaa deyne ma ogtahay Jaamacow.” Sidoo kale waxa uu xildhibaanka ku eedeeyay Jaamac in kursiga loogu hayo rabitaanka dowladdo shisheeye iyo dano gaar ah, islamarkaana uusan laheyn aqoon iyo waayo aragnimo uu ku noqdo wasiir difaac, sida uu sheegay.