Dagaal toos ah oo laga cabsi qabo inuu ka dhex qarxo Xizbullah iyo Israel.

 Afhayeenka Amniga Qaranka ee Aqalka Cad, John Kirby ayaa sheegay inaysan danta Israel ku jirin dagaal ay haatan la gasho Ururka Xisbullah ee dalka Lubnaan. Afhayeenka oo wareysi siiyay Warbaahinta ABC ayaa sheegay in Dowladda Mareykanka ay ku howlan tahay, sidii loo baajin lahaa dagaal dhinac kastaba leh oo ka qarxa Bariga Dhexe. Afhayeenka ayaa muujiyay in Dowladda Mareykanka ay ka soo horjeeddo isku dhac ballaaran oo gobolka ah, iyadoo ay sii xoogeysanayso xiisadda ka dhalatay colaadda Gaza. Israel ayaa ku hanjabtay inay cudud militari u adeegsan doonto, sidii ay dib ugu soo celin lahayd Israeliyiinta barakaca uga maqan waqooyiga Israel, hanjabaadaas oo kordhisay xiisadda muddooyinkii ugu dambeysay ka jirtay xuduudda Israel iyo Lubnaan. Xisbullah waxay sheegtay inaysan joojin doonin weerarada ka dhanka ah Israel, inta ay Israel sii waddo weeraradeeda Marinka Gaza. John Kirby ayaa tilmaamay in Maamulka Madaxweyne Joe Biden uu sameynayo wax kasta oo isku day ah, si aan uga hortagno buu yiri in tani ay noqoto dagaal dhan walba ah oo halkaasi lagu la galo Xisbullah, kana gudba xadka Lubnaan. Afhayeenka ayaa sheegaya in ay jiraan habab aan ahayn hawlgal militari, oo horseedi kara in si nabdoon dadka Israeliyiinta ah loogu soo celiyo guryahooda. Waxa uu sheegay in wada-xaajoodka diblomaasiyadeed uu yahay kan ugu wanaagsan ee lagu dhameen karo xiisadda Israel kala dhaxeysa Xisbullah. “Waxaan aaminsanahay inay jiraan habab ka wanaagsan dagaal oo lagu isku dayo, si muwaadiniinta Israel dib loogu soo celiyo guryahooda waqooyiga iyo in kuwa halkaas jooga, si ammaan ah loo ilaaliyo, marka loo eego sii kicinta, ka dibna furin labaad laga furo halkaasi.” Ayuu yiri John Kirby. John Kirby ayaa yiri “Kordhinta militari kuma jirto danta ugu wanaagsan ee Israel. Mareykanka wuxuu rumeysan yahay in xalka diblomaasiyadeed uu weli yahay mid suurtagal ah.” Inkastoo uu Mareykanku yahay xulafada ugu weyn ee Israel, haddana ma cadda, sida uu u xakameyn karo Xukuumadda Raysal Wasaare Benjamin Netanyahu. Netanyahu ayaa la aaminsan yahay in Wasiirada xagjirka ah ee ka tirsan xukuumaddiisa ay ku riixayaan dagaalka Ururka Xisbullah. Diblomaasiyiinta shisheeye ee ku sugan gobolka ayaa ku andacoonaya in xabad joojin laga sameeyaa Gaza oo keliya ay keeni karto in xiisadda la dejiyo.

Shacabka dalka Yemen ayaa Jimcihii taageeray go’aanka Ururka Xuuthiyiinta ay ugu aargudayaan dilka Israel lagu eedeeyay inay u gaysatay Hoggaamiyihii Ururka Xamaas, Ismail Haniyeh, ka dib bannaanbaxyo ay ka dhigeen magaalooyinka dalkaasi qaarkood. Hoggaamiyaha Xuuthiyiinta Yemen, Abdul-Malik Al Houthi ayaa maalin ka hor iclaamiyay in Ciidamada Yemen ay u aargudi doonaan Ismail Haniyeh, Israel-na ay nafteeda eedi doonto, sida uu yiri. Caasimadda Sanca oo kale boqolaal kun oo qof ayaa isugu soo baxay, si ay garab istaag ugu muujiyaan mowqifka Xuuthiyiinta. Qaar badan oo ka mid ah dibadbaxayaasha ayaa watay sawirrada Ismail Haniyeh iyo Abaanduulihii Garabka Militariga Xisbullah, Fu’ad Shukur, kuwaa oo laba maalmood oo isku xigta lagu kala dilay Magaalooyinka Tehran iyo Beirut. Shacabka Yemen ayaa horey u taageeray weerarada ay Xuuthiyiinta ku bartilmaameedsanayaan maraakiibta, laguna go’doominayo Dekedaha Israel, si Tel Aviv loogu cadaadiyo in ay joojiso weerarada ay ka waddo Marinka Gaza. Xoogaga Xuuthiyiinta ayaa maraakiibta laga leeyahay dalalka Mareykanka, Ingiriiska iyo Israel ku khasbay in ay ka cararaan marin biyoodyada Badda Cas iyo Gacanka Cadmeed. Sidoo kale maraakiibta kale ee ganacsi ee ku sii jeeda Dekedaha Israel ayaa ku khasbanaaday in ay joojiyaan isticmaalka marin biyoodyadaasi, si aysan bartilmaameed u nqoon, iyagoo adeegsanaya waddo wareeg oo kharash badan, waqtiga safarkana uu dheer yahay. Hoggaamiyaha Xuuthiyiinta ayaa ku hanjabay inaysan joojin doonin weeraradooda ka dhanka ah maraakiibta, inta Israel ay waddo weeraradeeda naxariis darrada ah ee ay ku leynayso dadka reer Gaza. Tan iyo markii ay Israel weerartay Marinka Gaza, xaaladda Bariga Dhexe ayaa ahayd mid kacsan.

Ciidamada Maamulka Israa’iil ayaa sheegay in gantaal laga soo riday dalka Yemen uu ku dhacay Bartamaha Israa’iil, gaar ahaan dhul furan, waana halis kale oo ka soo cusboonaatay gobolka. War qoraal ah oo Taliska ciidanka Israa’iil uu ka soo saaray arrintaan ayaa lagu sheegay in gantaal nooca dhul ka dhul ka gudba uu ku dhacay dhul furan oo ku yaala Bartamaha Israa’iil. Israa’iil warkeeda kuma sheegin wax khasaare nafeed uu uu geystay gantaalka ay sheegeen in laga soo riday dalka Yemen. Sidoo kale hoggaanka gudaha Israa’iil ayaa sheegay inay jirto digniin la xiriirta in diyaaradaha aan duuliyaha lahayn ay soo galeen hawada Israa’iil, kuwaas oo laga soo kiciyay kurayaatka Shamuunah iyo magaalooyin kale oo ku dhaw xuduudda Lubnaan. Wargeyska Times of Israel ayaa isna sheegay in digniino badan ay ka jiraan deegaannada Bariga Jaliil oo ay ku jiraan degmooyinka Madillah, Tel-Xawa, iyo Manaarah. Warbaahinta maanta werisay in diyaarad nooca aan duuliyaha lahayn oo laga soo kiciyay Lubnaan ay ku qaraxday tuulada Madillah ee xuduudda woqooyi ee dhulka Israa’iil. Ciidanka Israa’iil ayaa sheegay in ay u kuur galayaan wararka la xiriira diyaaradaas, in kastoo ay sheegeen in cid wax ku noqotay aanay jirin, marka laga reebo burbur ay geysatay. Sida laga soo xigtay warbaahinta maxaliga ah, diyaaradda aan duuliyaha lahayn ayaa qaraxday kahor inta aan laga dhawaajin codadka digniinaha bixiya. Xaaladda gobolka ayaa cirka isku sii shareereysa, Xuutiyiinta Yemen oo ay taageerto Iran oo Israa’iil uu dagaal kala dhexeeyo ayaa loo arkaa kuwo daandaansanaya Israa’iil, horayna waxay u geysanayeen weerarro dhanka bada ah oo dunida saameeyey.