Ciidamada Israel ayaa maalintii labaad hawlgal ka wada qaybo ka mid ah Daanta Galbeed ee dhulka Falastiiniyiinta ee la haysto, iyagoona kula dagaalamaya kooxaha wax iska caabinta ee halkaasi ka dilaacay, kana soo horjeeda in ay gumeysiga ku sii hoos noolaadaan. Ciidamada Israel oo taageero ka helayo diyaaradahooda dagaalka ayaa Arbacadii xoog ku galay Magaalooyinka Jenin, Tulkarm iyo Tubas ee Daanta Galbeed. Israel ayaa afar guuto oo ciidan ah soo gelisay goobaha uu hawlgalku ka socdo, si ay u soo qabqabtaan amaba ay u dilaan kooxaha hubeysan ee Falastiiniyiinta. Dadka deegaanka ayaa hawlgalkan ku sheegay kiisii ugu weynaa ee ay arkaan, tan iyo Intifaadada labaad ee Falastiiniyiinta oo bilowday sanadkii 2000. Taliska Militariga Israel ayaa sheegay in hawlgal ka dhan ah waxa ay ugu yeereen argagixisada ay ka bilaabeen Jenin iyo Tulkarm, iyagoona sheegay in ay ku dileen 5 nin oo hubeysan. Taliska ayaa sidoo kale sheegay in afar kale lagu dilay weerar xagga cirka ah oo ka dhacay xerada qaxootiga Al-Faraa ee u dhow Magaalada Tubas. Wasaaradda Caafimaadka Falastiin ayaa sheegtay in ugu yaraan 10 qof oo Falastiiniyiin ah lagu dilay duqaymo ay Ciidanka Cirka Israel ka gaysteen waqooyiga Daanta Galbeed. Maamulka Falastiiniyiinta ee fadhigoodu yahay Magaalada Ramallah ayaa cambaareeyay hawlgalka ballaaran ee ay Israel ka waddo dhulka la haysto. Wakaaladda Wararka Falastiiniyiinta ee WAFA ayaa saaka ku warantay in 20 kaloo Falastiiniyiin ah lagu dhaawacay hawlgalka militari ee lagu bartilmaameedsaday magaalooyinkaasi. Kor u kaca rabshadaha ka jira Daanta Galbeed ayaa bilowday, ka dib markii Israel ay weerar cir iyo dhulba ku qaadday Marinka Gaza. Isku dhacyada Daanta Galbeed ayaa billihii ugu dambeeyay lagu dilay in ka badan 600 oo Falastiiniyiin ah, iyadoo kumanaan lagu dhaawacay, halka kumanaan kalena lagu xirxiray. Kooxaha wax iska caabinta Falastiiniyiinta ee ka dilaacay Daanta Galbeed ayaa ka biyo diidan ficilada waxashnimada ah ee nidaamka gumeystaha. Kooxahan oo aan si sax ah loo ogeyn halka ay ku tababartaan ayaa bilaabay inay Israel si toos ah ugu la dagaalamaan Daanta Galbeed, iyagoo ka carreysan duulaanka Israel ee Gaza. Khubarada ayaa horey uga digay inaysan Israel ku guuleysan doonin dagaalka Gaza, inta ay si naxariis darro ah u leynayso qoysas dhan oo aan waxba galabsan, taasna ay xoojineyso uun iska caabinta. Dhallinyaro fara-badan oo ka carooday dilka loo gaystay xubno ka mid ahaa qoysaskooda iyo eheladooda ayaa qaybtood ku biiray kooxaha wax iska caabinta ee ka dagaalamaya Gaza, halka qaar kalena ay Israel furin cusub kaga fureen Daanta Galbeed. Israel ayaa shalay sheegtay in Iran ay ka masuul tahay dabka haatan ka holcaya Daanta Galbeed ee la haysto, iyadoo ku eedeysay inay si qarsoodi ah hubka ku soo geliso dhulkaasi. Israel Katz, Wasiirka Arrimaha Dibadda Israel ayaa sheegay in Israel ay waddo qorshe ay kaga hortageyso kaabeyaasha argagixisada Iran, sida uu yiri. Iran waa dowladda keliya caalamka ee la ogyahay inay taageero militari iyo mid maaliyadeedba siiso kooxaha wax iska caabinta Falastiiniyiinta. Iran waa quwad ka jirta Bariga Dhexe, isla-markaana ay si weyn isu hayaan Israel oo Mareykanka uu la safan yahay.

Maamulka Boqortooyada Sacuudi Carabiya ayaa ku dhawaaqay Cabdul Wahab bin Zain Al Abidin Al Shaibi inuu yahay shakhsiga furaha Kacbada Kacbada hayn doona kadib markii uu geeriyooday Sheikh Saleh Al Shaibi. Munaasabada lagu wareejinayay furayaasha Kacbada iyo Maqaam Ibraahim (Maqaamka Nabi Ibraahim) ayaa Isniintii lagu qabtay magaalada Makkah. Sheikh Cabdul Raxmaan bin Salex Al-Shaibi, oo wiil uu dhalay Sheikh Salex Al-Shaibi, ayaa furaha ku wareejiyay Sheekh Cabdul Wahaab bin Zain Al-Abidin Al-Shaibi, oo ah mas’uulka 78-aad ee Kacbada. Sheekh Abdul Wahaab oo ah qofka ugu da’da weyn qoyska Al-Shaiba, ayaa loo magacaabay inuu beddelo Sheikh Saleh Al-Shaibi, oo ahaa sii hayaha sare ee Kacbada oo geeriyooday Jimcihii la soo dhaafay. Waxaa caado ah in furaha Kacbada iyo Maqaam Ibraahim lagu wareejiyo qofka ugu da’da weyn qoyska Al-Shaiba. Ka dib markii uu la wareegay furaha Kacbada, Sheekh Cabdul-Wahaab wuxuu yiri: “Ilaahay ha igu guuleeyo gudashada waajibaadkan iyo mas’uuliyadda labada masjid ee barakeysan.” Sheekh Cabdul-Wahaab waxa uu furi doonaa Kacbada si uu u fududeeyo dhaqidda munaasibka ah ee sanadlaha ah ee Muxaram 15, 1446. Ilaaliyaha Kacbada waa qofka kaliya ee haysta furaha Kacbada, wuxuuna u xil-saaran yahay wax kasta oo la xiriira arrimaha Beydka Alle, oo ay ka mid yihiin beddelidda Kiswada (marada ku daboolan), dhaqidda, iyo carfinta. Tan iyo waagii Nebi Muxamed (scw) qoyska reer Banii Shayba waxa loo igmaday ilaalinta Kacbada, furaheedana ay hayaan. Qoyska Shaiba waxay sii wadaan inay ixtiraamaan sunnadii Nebiga (NNKH) iyagoo u dhiibaya jagada ilaaliyaha (sadin) ee Kacbada xubintooda ugu da’da weyn. Markii uu Nebigu (NNKH) galay Kacbada markuu Makka qabsaday ayuu burburiyay dhammaan sanamyadii ku jiray, wuuna mayray, albaabkiina wuu xidhay, dabadeedna wuxuu u yeedhay Cusmaan Bin Talxa oo ka mid ahaa qoyska Bani Shaiba, wuxuuna u dhiibay furihii isagoo leh, “Furayaashani way sii jiri doonaan ilaa maalinta qiyaame. Cid kaa qaadi karta ma jirto aan ahayn daalim. Qoyska Al-Shaiba waxa ay ilaa waagaas ahaayeen kuwa ilaaliya Kacbada sida uu Eebbe u doonayey iyaga oo lagu soo dajiyay aayadda keliya ee ku soo degtay gudaha Kacbada. “Runtii, Allaah wuxuu ku amrayaa inaad u dhiibto ammaanada cidda leh. Axmed Adan Dagaal (Axmed Safiina) oo ka faalooda taariikhda islaamka ayaa BBC Somali u sheegay: “Wakhtigii Nebigu dhashay beelaha Qureysh shaqada Xaramka way u qaybsanayd”. “Reer Banii Haashim oo uu Nebigu ka dhashay waxay lahaayeen oo ay hayeen furaha ceelka Zamzamka iyo waraabinta xujayda oo loo yaqaanay (Al-Siqaaya). Furaha Kacbadan waxa hayay beesha reer Baniishayba,” ayuu yiri. Dr. Saleh Al-Shaibi, oo ahaa caalim weyn, aqoonyahan iyo qoraa, waxa uu ahaa ilaaliyaha sare ee Kacbada, muddo toban sano ah. Waxa uu qabtay booska 77-aad ee furaha Kacbada kadib geeridii adeerkiis Sheikh Abdulqadir Al-Shaibi Oktoobar 2014, wuxuuna hayay booskan ilaa dhimashadiisa. Al-Shaibi wuxuu ahaa ilaaliyaha sare ee 10-aad inta lagu guda jiro xilliga casriga ah ee Sacuudiga, wuxuuna la socday xaaladda labada masaajid ee barakeysan. Sheikh Saleh Al-Shaibi waxaa xilka kala wareegay Sheikh Abdul Wahhab Al-Shaibi oo ahaa qofka ugu weyn qoyska. Muxuu furaha Kacbada ka sameysan yahay? Waxa uu sheegay in furaha uu ka samaysan yahay bir, dhererkiisuna yahay 35 sentimitir. Waa la beddelay oo la casireeyay dhawr jeer qarniyadii la soo dhafay oo dhan. Maanta furaha iyo qufulka Kacbada waxaa laga sameeyay Nikkel oo lagu dhejiyay dahab 18-carat ah halka Kiswada gudaha ama gogosha Kacbada ay tahay cagaar. Al-Zulfah wuxuu sheegay in qaabka furaha la bed-bedelo had iyo jeer. Dalka Turkiga waxa ku yaala madxaf ay yaallaan 48 furo oo kacbada lagu furi jiray laga soo bilaabo dawladdii Cusmaaniyiinta, halka Sucuudiga ay yaalaan laba nuqul oo furahaasi ah oo ka samaysan dahab saafi ah.    

Madaxweyne ku xigeenka Maraykanka Kamala Harris, ayaa Isniinti shalay si degdeg ah u dhaqaajisay tallaabooyinka ugu horreeya ee ololaheeda doorashada, si ay u caddeyso in ay tahay musharaxa ugu cadcad musharaxnimada xilka madaxweynenimada ee xisbiga Dimuqraadiga. Harris, ayaa shalay oo kaliyah ururisay tobanaan milyan oo doolar oo ay ugu yabooheen deeq-bixiyaasha dimoqraadiga, iyada oo taageero ballaaranna ka heshay madaxda ugu sarreeya xisbiga Dimoqraadiga. Maanta oo Talaada ah ayaana lagu wadaa in ay si rassmi ah olalaheeda doorashada uga billowdo magaalada Miluaki ee gobolka Wisconsin. Haddaba, sida ay ku billowday olalaheeda iyo taageerada ay heshay, ayaan ka wareystay Maxamuud Muse Xasan oo ka faallooda arrimaha siyaasadda Mareykanka, kana mid ah hogaamiyaasha bulshada Soomaalida ee gobolka Minnesota.