Wasiirka maaliyadda Kenya ayaa lagu wadaa in uu Khamiista soo bandhigo miisaaniyaddii ugu ballaarneyd abid, oo uu la socdo sharci muran badan dhaliyey oo ay ku jiraan canshuur kordhino cusub. Xukuumadda Madaxweyne William Ruto ayaa diyaarisay miisaaniyad afar tiriliyan oo shilin ah, oo u dhiganta ($31.1 bilyan) sanadka 2024/25, taasi oo ka badan 3.75 trillion oo shilin oo bishii June ee sanadkii tegay loo ansixiyey sanad miisaaniyadeedkan. Baarlamaanka ayaa horey u ansixiyay qorshaha qarashka ee la soo jeediyay, laakiin sharciga maaliyadda ee gaarka ah ee loogu talogalay buuxinta khasnadaha dowladda ay lacag la’aanta hayso, ayaa keeni kara kalfadhi aan caadi aheyn. Hindise-sharciyeedka – oo ay dowladdu ku dooday inuu yahay tallaabo lagama maarmaan ah oo lagu dhimayo ku-tiirsanaanta daynta — ayaa dhalleeceyn xooggan kala kulmay siyaasiyiinta, Kenyan-ka shaqeeya iyo kooxaha ganacsiga. Waxa uu soo jeedinayaa tiro cashuur kordhin ah oo la filayo in lagu soo rogo adeegyada maaliyadeed, wax soo-saarka iyo qaybaha ganacsiga. Qodobada ugu muranka badan waxaa ka mid ah; billaabista canshuurta gaadiidka oo laga dhigayo 2.5% qiimaha baabuurka, iyo dib u billaabida canshuurta rootiga. Dadka kasoo horjeeda ayaa ka digay in tillaabooyinka cusub ay culeyska ku sii kordhin doonaan dadka markii horeba la halgamayay sidii ay nolol maalmeedkooda u dabooli lahaayeen xilli qiimaha nolosha uu aad sare ugu kacay. Kor u qaadis canshuur oo sidoo kale la sameeyey sanadkii hore ayaa horseeday mudaaharaadyo dhowr ah oo ay ku baaqeen mucaaradka kuwaas oo mararka qaar isu bedelay isku dhacyo lagu dhintay oo waddooyinka ku dhex maray booliiska iyo dibad-baxayaasha. Kenya waa mid ka mid ah dalalka ugu dhaqaalaha wanaagsan Bariga Afrika laakiin saddex meelood meel, 51.5 ka milyan ee qof ee dalka ku nool ayaa ku nool saboolnimo. Sicir-bararka ayaa ahaa mid aad u sarreeya, oo ah heerkiisu ahaa 5.1 boqolkiiba bishii May, halka sicir-bararka cuntada iyo shidaalka uu gaaray 6.2 boqolkiiba iyo 7.8 boqolkiiba siday u kala horreeyaan, sida ku cad xogta Bankiga Dhexe. Dawladdu waxay saadaalisay cel-celiska kobaca dhaqaalaha uu gaari doono 5.2 boqolkiiba inta u dhaxaysa 2024 iyo 2026. Bankiga Adduunka ayaa warbixin uu soo saaray todobaadkii hore ku sheegay in kobaca wax-soo-saarka dhabta ah ee Kenya uu sannadkii hore sare u kacay 5.6 boqolkiiba, halka uu ka ahaa 4.9 boqolkiiba 2022.        

In ka badan hal milyan iyo bar oo Xujey ah ayaa maanta isugu soo uruuray Buurta Carafo, iyaga oo gudanaya maalinta ugu muhiimsan ee waajibaadka Xajka. Xujeyda oo isaga kala yimid dunida dacaladeeda ayaa gudanaya rukunada ugu muhiimsan, uguna dambeeya acmaasha Xajka. Xujeyda ayaa Alle ka baryaya dembi dhaaf, una duceynaya ummadda Muslimiinta ee caalamka oo dhan. Maanta oo kale waa maalinta Xujeyda ay ugu baryada badan yihiin Alle xagiisa, iyagoo gacmaha kor u taagaya, weydiisanayana waxa ay doonayaan. Maanta waa maalin ku weyn ummadda Muslimiinta, waana maalin qiimo badan oo kan sooman uu Alle ugu dembi dhaafayo sanadkii tagey iyo kan soo socdaba. Xajku waa mid ka mid ah shanta tiir ee Islaamka, waxaana uu ku waajibaa qof kasta oo qaangaar ah, caafimaad qaba, isla-markaana awooda. Ummadda Muslimiinta ayaa waxaa ku waajiba in ugu yaraan ay halmar xajiyaan, inta noloshooda ah, haddiiba ay awoodaan. Xajka ayaa ka kooban dhowr cibaado oo la guto, waxaana ugu muhiimsan maalinta 9-aad ee bisha Dul Xaj, oo ah maalinta ay Muslimiinta isugu soo baxaan Buurta Carafo. Sanadkii hore waxaa Xajka gutay 1.8 milyan oo qof, sida ku cad tira-koobka rasmiga ah ee Boqortooyada Sacuudiga. Si kastaba ha-ahaatee Axadda berrito ah ayaa dunida Muslimka iyo wadamada kale ee ay Muslimiinta ku nool yihiin laga ciidi doonnaa maalinta 1aad ee Ciidul Adxaa, taas oo geba-gabo u ah gudashada acmaasha Xajka iyo taagnida Xujeyda ee Banka Carafo. Ciiddan oo sidoo kale loo yaqaano (Ciidda Carafo) ayaa ah Ciidda Labaad ee Islaamku uu leeyayay.

Madaxweynaha Faransiiska, Emmanuel Macron ayaa dhalleeceeyay diidmada ay Israel kala hortimid qorshaha ay iyaga iyo Mareykanka ugu gogol xaarayaan in muddo 21 cisho ah xabad joojin lagaga sameeyo xudududa Israel iyo Lubnaan. Madaxweynaha Faransiiska ayaa walaac ka muujiyay tallaabada ay Israel ku qaadacday in fursad la siiyo dadaalada caalamiga ah, ee ah in wada-xaajood lagu soo afjaro xiisadda labada dal. Madaxweynaha oo booqasho ku jooga dalka Canada ayaa sheegay in iyadoo Canada iyo dalal kale ay kala shaqeynayaan, sidii looga baaqsan lahaa isku dhac ballaaran ay Israel diidan tahay inay taasi dhacdo. Waxa uu sheegay in dhacyada dalka Lubnaan ay soo dhaweeyeen hindisaha xabad joojinta ku-meel-gaarka ah, balse aysan Israel soo dhaweyn. “Xisbullah waxay muujisay inay diyaar u tahay xabad joojinta. Hadda qof kasta wuxuu sugayaa Raysal Wasaaraha Israel, Benjamin Netanyahu.” Ayuu yiri Madaxweynaha Faransiiska oo wareysi siiyay Warbaahinta CBC ee Canada. Madaxweyne Macron ayaa Mareykanka ugu baaqay inuu Israel ku cadaadiyo in ay aqbasho hindisaha xabad joojinta iyo in colaadda labada dal lagu dhameeyo miiska wada hadalka. Washington iyo Paris ayaa Arbacadii soo jeediyay qorshe muddo 21 cisho ah lagu hakinayo colaadda, si loo sameeyo wada-xaajood horseedaya in la gaaro heshiis nabadeed, iyadoo shacabkii labada dhinac ee barakacayna ay si nabdoon ugu soo laabanayaan guryahooda. Emmanuel Macron, Madaxweynaha Faransiiska ayaa sheegay in weerar dhinaca dhulka oo Israel ku qaaddo dalkaasi uu noqon doono khalad aad u weyn. “Waxaan aaminsanahay in aan weli haysano saacado yar oo Raysal Wasaare Netanyahu uu ku bixin karo fursad nabadeed.” Ayuu yiri Madaxweyne Macron. Madaxweyne Macron ayaa yiri “Waxaan aaminsanahay in Mareykanku uu hadda kordhinayo cadaadiska Raysal Wasaaraha Israel, si uu sidaas u sameeyo. Haddii Netanyahu uu yiraahdo maya, Faransiisku wuxuu arrinta u gudbin doonnaa Golaha Ammaanka ee Qaramada Midoobey.” Wasiirka Arrimaha Dibadda Lubnaan, Abdallah Bou Habib ayaa sheegay in Gobolka Bariga Dhexe oo dhan uu halis ugu jiro dagaalka ay Israel fidineyso. Wasiirka oo khudbad ka jeedinayay Shirka Golaha Guud ee Qaramada Midoobey ayaa Beesha Caalamka ugu baaqay in la qaado tallaabo lagu joojinayo gardarrada Israel. Israel ayaa iska dhega tireysa baaqyada xulafadeeda muhiimka ah, xilli ay ogsoon tahay cawaaqibka uu leeyahay dagaalka ay ballaarineyso. Masuuliyiinta Israel ayaa ku hanjabaya inay ciidamadooda duulaan dhinaca dhulka ah ku qaadi doonaan dalka Lubnaan, si shacabkoodii ku barakacay xiisadda xuduudda ay guryahooda ugu soo laabtaan.