Wasiirka Owqaafta iyo arrimaha diinta XFS Mukhtaar Roobow Cali Abuu Mansuur ayaa kulan miro dhal ah la qaatay Wasiirka Xajka iyo Cumrada Dowladda Sacuudiga mudane Towfiiq Binu Fowsaan.

  Baarlamaanka Jubaland ayaa dhowaan u codeeyay wax ka bedel lagu sameeyey qaar ka mid ah qodobada dastuurka Jubbaland, tallaabadaasi waxay sii xoojisay hubanti la’aan ka taagan doorashada maamulkaas, carada iyo walaaca mucaaradka ayaa cirka isku sii shareeray. Wasiir ku xigeen wasaaradda cadaaladda iyo arrimaha dastuurka ee dowlad goboleedka Jubaland Bishaar Aadan ayaa markii ugu horeysay sheegay waqtiga rasmiga ah oo ay dhaceyso doorashada madaxtinimada maamulkaas oo wajaheysa hubanti la’aan weyn. Wasiirka oo ka qeyb galay barnaamij dood ah oo  ay qabatay warbaahinta maxaliga  ayaa muddo ka meer-meeray su’aal laga weydiiyey goorta ay dhaceyso doorashada maamulkiisa, balse markii dambe wuxuu sheegay in bisha 11-aad ay doorasho ka dhaceyso Jubbaland. “Wakhti ay doorasho dhacayso wasiir ma sheego ee guddi doorasho ayaa sheega, taana qorsheheedu waa uu socdaa, madaxweyneheyga ayaa saxiixay in ay November doorasho dhacayso, sidaas ayuuna qorshuhu yahay,” ayuu yiri Wasiir ku xigeen wasaaradda cadaaladda iyo arrimaha dastuurka Jubaland. Waxaa taagan muran ka dhashay wax ka badelka dastuurka, baarlamaanka ayaa toddobaadkii hore u codeeyey in dastuurka Jubbaland laga saaro qodobkii xadidayey inta jeer ee xilka Madaxweynaha uu u tartami karo Axmed Madoobe oo hoggaanka maamulkaas hayey tan iyo markii la aas-aasay Jubbaland 10 sano ka hor. Siyaasiyiinta mucaaradka ku ah Axmed Madoobe ee ka soo jeeda Jubbaland ayaa qaba in wax ka bedelka lagu sameeyey dastuurka maamulkaas ay tahay tallaabo khaldan oo aysan fileyn. Sidoo kale mucaaradka ayaa sheegay in arrintaan ay horseedi karto muddo kororsi uu sameyto Axmed Madoobe, waxay ku doodeen in muddo xileedkii baarlamaanka uu gabaabsi yahay oo bishii ugu dambeysay ay ku jiraan, sidoo kale waxay sheegeen in Axmed Madoobe uusan xaq u laheyn in mar kale uu u tartamo kursiga madaxweynaha. Siyaasiyiinta maamul-goboleedkaas oo qaar ka mid ah ay yihiin musharraxiinta madaxtinnimada ayaa dalbaday in la shaaciyo xilliga rasmiga ah ee doorashadu ay dhacayso. Bisha soo socota ee Agoosto ayuu ku egyahay muddo xileedka Axmed Madoobe, mana socoto ififaalo muujineysa inuu doorasho qaba doono, balse wasiirkiisa ayaa sheegay in bisha November ay doorashada qabanayaan, doorashooyinka ka dhaca Jubbaland ayaa lagu tilmaamaa kuwo aan xor aheyn oo Axmed Madoobe toos u maamulo.

Dowladda federaalka Soomaaliya ayaa shaacisay inay qaadaneyso layli saraakiil cusub oo rag iyo dumarba leh. Qoraal kasoo baxay Taliska ciidanka xoogga dalka Soomaaliyeed ayaa lagu shaaciyay in arji qabashada ay bilaaban doonto 6-da bisha soo aadan ee Luulyo illaa 25-ka Luulyo. Shuruudaha uu soo saaray taliska ayaa waxaa kow ka ah in uusan qofka horey uga soo mid noqon kooxaha argagixisada, islamarkaana ay da’diisu u dhaxeyso 18 sano ilaa 22 sano. Saraakiisha cusub ee dowladda qoraneyso ayaa waxaa lagu tababari doona kuliyadda Turksom ee magaalada Muqdisho, ayada dowladda Turkiga ay dabooleyso dhamaan baahiyaha dhalinyarada loo laylinayo sarkaalnimada. Hoos ka aqriso shuruudaha iyo qoraalka kasoo baxay taliska. Taliska ciidanka X.D.Soomaaliyeed waxa uu qaadanaya layli saraakiil cusub oo rag iyo dumarba leh. Dumarka : 20ka Luulyo ilaa 25Ka Luulyo Shuruudaha: Waa inoo ahaada muwaadin Jamhuuriyadda Federaalka soomaaliya. Waa inoo wataa Shahaado dugsi sare oo asal ah(orginal) ama wax ka sareyo. Waa inay Da’da u dhaxeysaa 18 sano ilaa 22 sano jir (2002-2006). Hadii uu ardayga sanadkaan dugsi sare ka qalin jabiyay aanu wali uso bixin shahaadada waxaa laga doonaya Warqad cadeynaysa inuu shahaado suge yahay oo timbaraysan. Kaarka imtixaanka dowladda uu ku galay. Dhalasho Iyo sugnaan oo gobolka ah ama Passport. In uusan horay uga soo mid noqonin kooxaha argagixisada ah. In uusan balwad lahayn. Heerarka dhirika iyo culeyska waxaa lagu muujiyay Tusmada 1’aad. Heerarka awoodda jirka waxaa lagu muujiyay Tusmada 2aad. Maadooyinka Imtixaanka qabuulka iyo tirada su’aalaha waxaa lagu muujiyay Tusmada 3-aad. FG: Ardayga hadii uu ku imaanayo shahaado Jaamacadeed waxa uu horay usoo qaadanayaa Shahaadada dugsi sare oo asal ah (orginal). Dhamaan ducoment-yada lagaa doonayo waa inay asal ahaadan (orginal) hadii aad fotokopi la timaado laguma qaabili doono  

Hay’adda Isgaarsiinta Qaranka ayaa ku guuleystay saddex shahaado oo caalami ah oo uu bixiyo ururka caalamiga ah ee ISO. Munaasabad lagu soo bandhigay seddexda shahaado ayaa lagu qabtay xalay magaalada Muqdisho, kaas oo ay ka qeybgaleen Wasiiro katirsan Xukuumadda Federaalka Soomaaliya, mas’uuliyiin ka socda dhammaan shirkadaha isgaarsiinta, jaamacadaha, bankiyada, iyo ururrada bulshada rayidkaa ah. Wasiirka Boostada iyo Isgaarsiinta Xukuumadda Federaalka Soomaaliya Mudane xildhibaan Maxamed Aadan Macalin (Soomaali) oo munaasabadda ka hadallay ayaa sheegay inaysan aheyn wax sahlan ku guuleysiga saddex shahaado caalami, taasoo keentay shaqo la taaban karo in laga qabatay dalka. Maareeyaha Hay’adda Isgaarsiinta Qaranka, Mudane Mustafa Yaasin ayaa isna sheegay in hay’adda qabatay howlo muhiim u ah Qaranka taasoo keentay in ururka Caalamiga ah ISO ka helaan shahaadooyinkaas caalamiga ah.