Xisbullaah oo soo riday diyaarad ay leedahay Isreal xilli ay hawada Lubnaan soo gashay.

Dowladaha Mareykanka iyo Jarmalka ayaa si wada jir ah ugu dhawaaqay in Mareykanka uu sannadka 2026-ka billaabayo inuu Jarmalka geeyo gantaallada riddada dheer. Warkaan ayay labada dal uga dhawaaqeen shirweynaha isbaheysiga NATO ee ka socda magaaladan Washington. Tan ayaa waxaa loo arka tallabo weyn oo looga gol leeyahay in lagaga hortago waxa ay xulafadu ku sheegeen khatarta sii kordhaysa ee Ruushku ku hayo Yurub. Go’aankan ayaa u diri doona Jarmalka hubka ugu awooda badan ee Maraykanka heysto, waxana ay noqon doontaa markii ugu horreysay oo uu Mareykanka hub aad u culus ku rakibto Yurub tan iyo dagaalkii qaboobaa. Khubarrada ayaa ku sheegay tallaaban, digniin cad oo ku wajahan madaxweynaha Ruushka Vladimir Putin. Hogaamiyaasha NATO ee ku shiraya caasimadda Mareykanka ayaa dhanka kale ballan-qaaday gargaar lacago dheeraad ah oo ay ugu deeqayaan dalka Ukraine, si ay isaga difaacaan duullaanka Ruushka. War murtiyeed ay Arbacadi soo saareen, ayay madaxda NATO ku sheegeen in ugu yaraan 40 bilyan oo yuro oo u dhiganta ($43.28 bilyan) Ukraine loogu gado agab millatari la gaarsiin doono sannadka dambe.

Madaxweynihii hore ee Mareykanka ayaa gelinki danbe ee Axaddii shalay ka badbaaday isku-day kale oo lagu khaariji rabay, xilli uu ku sugnaa beertiisa ciyaarta golf-ka lagu dheelo ee ku taalla magaalada West Palm Beach ee gobolka Florida. Ciidanka ilaalada qarsoon ayaa sheegay in ay arkeen nin hubeysan oo isku qarinayay juq u dhaw halka uu golf-ka ku ciyaarayay Trump, kadibna ay rasaas ku fureen, ka hor inta uusan cararin. Saraakiisha amniga ayaa sheegay in ninka falkan looga shakisanyahay uu goobta uga tagay qori nuuca daran-doorriga u dhaca iyo qalab kale, ka hor inta uusan ku cararin baabuur uu watay. Saraakiisha waxay kaloo sheegeen in Trump uusan wax dhaawac ah soo gaarin. Waa isku-daygi labaad oo lagu dili rabay madaxweynihi hore ee Mareykanka Donald Trump oo ay fashilinayaan ciidamada ammaanka muddo 9 todobaad gudahood ah. Trump oo ah murashaxa xisbiga Jamhuuriga ee doorashada madaxtinimada Mareykanka ee dhici doonta 5-ta bisha November ee soo socota ayaa isna qoraal kooban uu soo saaray ku sheegay in uu badqabo oo uu wanaagsan yahay. Warbaahinta Mareykanka gaar ahaan The Associated Press, The New York Times iyo Fox News ayaa ku warrantay, in saraakiil ka tirsan kuwa amniga Mareykanka ay ka soo xigteen magaca ninka looga shakisan yahay isku-dayga dil, kaas oo lagu sheegay Ryan Wesley Routh oo ah 58 jir ah kasoo jeeda gobolka Hawaii. Booliska ayaa sheegay in ninka tuhunsanaha ah laga soo qabtay jidka I-95 meel qiyaasti 65km u jirto beerta golf-ka Donald Trump. Ciidanka degmada Martin County ee gobolka Florida ayaa sheegay in ay gacanta ku dhigeen. Isku daygi hore ee lagu khaariji rabay Trump ayaa dhacay 13-ki bishi July, kadib marki wiil dhalinyaro ahaa oo marki danbe ay ciidamada amniga dileen uu meel sare kasoo toogtay Trump, kaddibna ka dhaacay dhegta. Weerarkaas ayaa waxaa duubay kaamirooyinka telefishannada Mareykanka oo tabinayay hadal-jeedin uu Trump kula hadlayay taageerayaashiisa gobolka Pennsylvania. Laanta Danbi-baarista Gudaha Mareykanka ee loo soo gaabdhso FBI ayaa sheegtay in ay billowday baaritaan ku aadan isku-dayga labaad ee lagu khaariji rabay Donald Trup.

Hoggaamiyaha Xuuthiyiinta Yemen ayaa dalka ay deriska yihiin ee Sacuudiga uga digay in lagu soo hoosaasiyo dagaal ay xilligan la galaan Yemen. Abdul-Malik Al-Houthi oo xalay jeediyay khudbad si toos ah looga daawanayay telefishinka afka Xuuthiyiinta ku hadla ee Al-Masirah ayaa Boqortooyada Sacuudiga uga digay inay gacan saar la yeelato Mareykanka, Ingiriiska iyo Israel ee cadowga ku ah buu yiri Yemen. Hoggaamiyaha Xuuthiyiinta ayaa marka hore sheegay in Ciidamada Yemen ay ku guuleysteen inay Badda Cas ka eryaan isbahaysiga Mareykanka uu hoggaamiyo ee loo aasaasay inay ka hortaggaan weerarada Xuuthiyiinta ku hayaan maraakiibta ganaciga ee ku wajahan Dekedaha Israel. Hoggaamiyaha ayaa khudbaddiisa ku sheegay in Mareykanku uu ku guuldareystay in dalalka Badda Cas uu ku soo daro hawlgalkiisa iyo in dalalka deriska la ah Yemen uu u adeegsado goob uu ka soo weeraro dhulkooda. “Mareykanku waxa uu weli isku dayayaa in Sacuudiga uu ku cadaadiyo, si cadaadis na loo soo saaro. Mareykanku wuxuu Sacuudiga ku khasbayaa in uu qaado tallaabooyin cadowtinimo ah waqti xaadirkan oo ka dhan ah Yemen, iyadoo markaasi la taageerayo Israel.” Ayuu yiri Hoggaamiyaha Xuuthiyiinta. Waxa kaloo uu yiri “Mareykanku waxa uu damacsan yahay in uu Sacuudiga nala galo dagaal dhan walba ah, xiisaddana uu gaarsiiyo heerkii ugu sarreysay.” Abdul-Malik Al-Houthi, Hoggaamiyaha Xuuthiyiinta Yemen ayaa yiri “Waxaan u aragnaa tallaabo kasta oo Sacuudiga uu ku soo hujuumo Yemen mid faa’iido u ah Israel iyo Mareykanka.” Hoggaamiyaha ayaa Sacuudiga ku booriyay inaysan ku dhicin dabinka Mareykanka, ayna ogaadaan in shacabka Yemen ay ka soo horjeedaan xasuuqa Israel ku hayso shacabka Falastiiniyiinta. Isaga oo sii hadlayay ayuu Riyadh uga digay in ay la soo safato Mareykanka, isla-markaana ay ka fogaadaan sida uu yiri ficilada nacasnimada ah. “Waan ka digaynaa, waxaana ku talinaynaa in Sacuudigu uu ka fogaado ficilada nacasnimada ah ee uu ku raacayo Mareykanka.” Ayuu yiri Abdul-Malik Al-Houthi. Abdul-Malik Al-Houthi ayaa xusay in Mareykanka, Israel iyo Ingiriiska ay la yaab ku noqotay sida uu yiri is garabtaagga Yemen ee shacabka Falastiin. “Teknolojiyadda casriga ah ee Mareykanka iyo UK waxay ku guuldareysteen inay joojiyaan hawlgalada aargoosiga ah ee Yemen.” Ayuu yiri Abdul-Malik Al-Houthi. Abdul-Malik Al-Houthi ayaa dunida Muslimka ku booriyay inay adkeeyaan midnimada iyo iskaashiga dhexdooda, isagoona ummadda Muslimiinta u soo jeediyay inay si sax ah ugu dhaqmaan Diinta Islaamka. Xuuthiyiinta Yemen ayaa isku dayaya in ay wiiqaan dhaqaalaha Israel, iyagoona go’doominaya dekedaheeda, si Tel Aviv culeys loogu saaro inay soo afjarto duulaankeeda Marinka Gaza iyo go’doominta ay muddada dheer ku hayso.